Saturday, November 27, 2010

بقايا الحلم

بقايا الحلم




فى علبه قطيفه
قام لملم
بقايا الحلم
واستسلم
وربع ايده..
.واستنى
يجي له الموت
كده فى سكوت


***
ماهو عايش
بقاله كتير
يبوس ف ايدين
سنين عمره
ويتمنى
تمر ببطأ
فتعانده
و من ايده

بسرعه تفوت
***


فيتحسر
على الحلم
اللى كان اكبر
فضل يصغر
ويتفتت
ويتشتت
فى ميت سكه


***
بقى حلمه
ف يوم يفرح
بقى حلمه
يادوب ضحكه
ف كلمه حب
تتقال له
ولو بالكدب
بقى حلمه
ف يوم يتحب
بقى حلمه
يبطل انه يتألم
ولكن كلها احلام


***
فقام سلم
وقام لملم
بقايا الحلم
واستسلم
وربع ايده
واستنى
يجى له الموت

25 comments:

فاتيما said...

ازيك يا محمد


انا مودى حزين الايام دى
وحاسة بكل كلمة
انتا كاتبها

تعرف ؟

يبدو ان مدام بنحلم
والحلم بيتفتت
او نحلم ونرضى بالواقع
او بنحلم ومفيش حاجة بتحصل خالص

يبقى الحل

منحلمش من اصله

مش كدا أريح؟

ولا إيه؟

مش عارفة


لما ابقى فى مود افضل
عارفة ومتاكدة
ان إجابتى
هتكون غير كدا خالص
بس غيرش هيا الأيام البخيلة
التى أعبر بحورها حالياً
وعلى وشك أغرق


طيب
حتى إشعار آخر

تسلم
ايديك ولسانك
وقلبك يا غالى
و
خالص ودى ليك
يا صاحب الحزن النبيل

Dr Ibrahim said...

كلمات جميلة ومعبرة عن من لايستطيع تحقيق حلمه أو من اصطدم بواقع لايناسبه وتبعثرت وصغرت كل أحلامه...
ولكن لو بطلنا نحلم نموت

همس الاحباب said...

كلمات حزينة تنفع عتاب رقيق
الحمد لله على كل حال
الرضا بقدر الله ومشيئته كنز عظيم
تحياتى

sony2000 said...

مخلاص
حياتنا كلها
بقت كدا
اول ذياره ومش الاخيرا باذن الله

حلم بيعافر said...

نهاية التشتت الاستسلام فعلا

كلام جميل

Anonymous said...

YA SALAM

rack-yourminds said...

كل سنه وانت بالف خير

فاتيما said...

غربااااااااااااوى

ازيك يا شوباب يا طيب

نما الى علمى ان سياستك ف مصر
ونزلت اجازة خلاويص

طيب



اولا
حمدلله ع السلامة



ثانيا
اجازة سعيدة ان شاء الله




ثالثاً
خلى بالك من قلبك ولا يهمك
يا جبل ما يهزك ريح هيا اول مرة
دا حتى على سلامة بيقول انا مرة عدى عليا القطر وممتش
واحلم زى ما تحب
حتى الاحلام هنقلصها ؟





رابعا بقى
انا مش عارفة اشكرك ازاى
لسؤالك عنى طول المدة اللى فاتت
رربنا يخليكم ليا
وانا عارفة غلاوتى عندك يا محمد
انتا كمان غالى قوى
وزى ماجد اخويا تمام



خامسا
انا بخير دلوقتى
وزى الفل



سادساً
اكتب حاجة جديدة
عشان
وحشتنى كتاباتك


سابعا
اشوفك دايما
ف احسن حال
يا رب


ثامنا
بوسلنا ايد الحاجة
وربنا يديها الصحة
ويفرحها بيكم دايما


تاسعا
كفاية كدا
لحسن هنضرب

:)

rack-yourminds said...

ازيك يا باشا اتمني تككون بالف خير

فاتيما said...

طب اقول ايه ؟

بص
انتا على بالى بقالى يومين
وبقول الجدع دا
خد ايميلى ومبعتش أى حاجة
لازم مشغول
لازم نفسه مسدودة
لازم لسه الحاجة تعبانة وهوه معندوش أى رغبة يتكلم مع روحه حتى
او بيستعد للسفر
أى سبب مخلنيش ابطل وغوشة
لحد ما منونا نشرت الخبر


اقول ايه؟

مفيش حاجة ممكن تنقال يا محمد
غير ربنا ومشيئته حكمت
وهوه وحده قادر يطيب ألمك
ويطبطب عليك


اما الغالية
فربنا يثبتها عند السؤال
ويسكنها واسع جناته
ويعلى مقامها بدعاك ليها
وصالح دعائك
اللى عارفة انه مش هينقطع
طول ما فيك نفس


عارف ؟
فيه بشر كدا بحس انهم وقت إسترداد ربنا ليهم ...المفروض محدش يشيل همهم
لأن طريقهم اتجاه واحد
ان شاء الله على الجنة
من كتر ما شافوا ف دنيتهم واتعذبوا
وربنا مخلى نوره باين على وشهم وقلبهم ومخلينا نثق بكل يقين انهم فى مكان احسن برحمة ربنا وبحنيته عليهم بعد تعب ف الدنيا

يتبقى الحنين ووجع الافتقاد
ودا اللى ملوش عندى
ولا عند أى حد أى حل غير
انك تقول يا رب الصبر


وانا وكل اللى بيحبوك
هيقولوها من قلوبهم يا محمد
ربنا يصبرك يا بنى ويثبت قلبك
ويجعل الأيام الجاية اخف فى حملها
ومع انى عارفة انه صعب قوى على قلب زيك يتحمل المصاب الفادح دا
بس ربنا يربط على قلبك
ويسكن الألم فى روحك يا غالى

قلبى وقلوبنا
كلنا معاك



شد حيلك
وربنا يبارك فى عمرك
افتكر دايما انك كنت فرحتها
وسندها
ولما تكون بخير تبقى اللى هيا عاوزاه حاصل و انتا قده وقادر تعمله
زى ما طول عمرك بتعمل
ورضاها عنك كان اهم شىء

صعب اقول دلوقتى
خلى بالك من نفسك
والكلام دا
بس هقولك بجد من قلبى

ربنا يباركلنا فى عمرك
و حس الحاجة فى الدنيا لن ينقطع
ما دمت انتا محمد الغرباوى
نور عينها والحتة الغالية من قلبها
و يا رب تكون بخير دايما


البقاء لله يا محمد
انا مش عارفة اقول حاجة
!!!
غير ربنا معاك يا غالى

اختك ام يوسف

خواطر شابة said...

البقاء لله ربي يصبر قلبك اخي ويجعل مثوى والدتك الجنة ان شاء الله
اعرف تماما ما تشعر به وأقدره لكن اعلم ان الله مع الصابرين فاصبر واحتسب
انا لله وانا اليه راجعون

rack-yourminds said...

الاخ الغالي محمد
دخلت زي كل مره اسلم عليك واشوف احوالك ,لكن فوجئت من خلال التعليقات بهذا الخبر الحزين

بجد مش عارف اقولك ايه ,لكن تعلم اخي قول الله سبحانه وتعالي

"وبشر الصابرين الذن اذا اصابتهم مصيبه قالواانا لله وانا اليه راجوعون
"
صدق الله العظيم

رحم الله والدتك واسكنها فسيح جناته

اسال الله انه يلهمك الصبر علي هذا الابتلاء العظيم

الحــب الجميـــل said...

البقاء لله

(يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَّرْضِيَّة فَادْخُلِي فِي عِبَادِي وَادْخُلِي جَنَّتِي)

اللهم ندعوك ياكريم يا أرحم الراحمين أن ترحمها رحمة واسعه

اللهم نقها من الذنوب كما ينقى الثوب الأبيض من الدنس
اللهم أجعل قبرها روضه من رياض الجنه وأرزقها الفردوس الأعلى

ربنا يصبرك يا استاذ محمد

Ramy said...

البقاء لله

ربنا يرحمها

و يصبر قلبك

صدقنى مش عارف اقول ايه

همس الاحباب said...

البقاء لله
ربنا يرحمها ويدخلها فسيح جناته
ربنا يلهمك الصبر والسلوان
تحياتى

موناليزا said...

لله ما اعطى ولله ما اخذ وكل شئ عنده بمقدار
ربنا يرحمها ويغفر لها ويرزقكم جميعا الصبر والسلوان

قوس قزح said...

البقاء لله
ربنا يغفر لها و يرحمها و يصبرك انت و اخوات

فاتيما said...

محمد

حمدلله ع السلامة
زمانك رجعت خلاص

ربنا معاك يا غالى
وياخد بيدك


انا قولت بس اطمن

حاجات جوايا said...

البقاء لله اخى الفاضل
اسال الله ان يلهمكم الصبر والسلوان
ويجعل مثوى والدتك الجنة
امين يارب العالمين
خالص عزائى

أبو حميد said...

البقاء لله يا محمد
أنا بقالى 33 أيام بكلمك وتليفونك مقفول

Soul.o0o.Whisper said...

انا لله و إنا اليه راجعون

البقاء و الداوم لله يا محمد

والله لسه عارفة حالا

ربنا يغفر لها و يرحمها يارب
و يرها مقعدها من الجنة

و يرزقكم جميعا الصبر و السلوان

rack-yourminds said...

اخي الغالي اعلم ان حزنك عظيم لكن تعلم جزاء الصابرين عند الله

انما يوفي الصابرون اجرهم بغير حساب
صدق الله العظم

فاتيما said...

عامل ايه دلوقتى يا محمد ؟

يا رب تكون أهدأ بالاً شوية
وربنا مثبت قلبك

ربنا يطمنا عليك
ويهون كل صعب
ان شاء الله


انا حبيت بس اسلم
واقول انك ف بالنا وقلوبنا
واخواتك بيدعولك

خلى بالك من نفسك
:)

nano north said...

فقام سلم
وقام لملم
بقايا الحلم
واستسلم
وربع ايده
واستنى
يجى له الموت

وهوا لسه النهارده هيموت ؟؟
ما هوا مات من سنين وسنين
تسلم يا صديقى عالكلمات التحفة
:(((

قمة الدقة said...

شركة تسليك مجارى بالرياض
شركة مكافحة النمل الابيض بالجبيل