Monday, July 12, 2010

لقاء رأس البر - يوم على جناح فراشه


من الصعب جدا ان تحظى بيوم غير اعتيادى فى حياتك الروتينيه الممله

لقاء راس البر هى ساعات مميزه وغير عاديه فى حياة معظم من حضروا اللقاء ابراهيم العدوى قد وصف اليوم بكل الكلمات الجميله وباسلوب اديب ماهر لذلك من الصعب مجاراته واعاده وصف اليوم الجميل

ساره رحيل سردت لحظات اللقاء لحظه بلحظه ناقله كل التفاصيل الصغيره وكأنها حملت كل من لم يأتى على كفيها معنا طوال الرحله

ليساندرا الرائعه تصر على ان يكون بوستها الاخير ولها ذلك بالتأكيد فهى صاحبه الفرح وأم العروس

لا أعرف ماذا أكتب تحديدا ولكن سأطلق عليكم دماغى وانتوا ونصيبكم بقى

اللقاء بالنسبه لى بدأ التفكير فيه من اول يوم اعلنت ليساندرا عن رغبتها فى تنظيم لقاء رأس البر

اللقاء منذ بدايته غير اعتيادى

اختيار المكان فكره جديده مدينه مصيف تختلف عن الاسكندريه فى كونها مصيف فقط واعتقد انها المره الاولى فى لقاءات المدونين

الميعاد تم النزاع على الميعاد لوقت طويل وصراحه انا الوم كل من قال انه سيأتى ولم يفعل وكل من تدخل فى تغيير الموعد ولم يوفى بوعده ولكن عزاء ليساندرا فى ذلك ان كل من لم يأتى خسر وقت مميز جدا



من الاسباب التى جعلت هذا اللقاء مختلفا
انه كان لقاء متجولا اكثر منه قعده وصراحه فانا علاقتى كانت قد قطعت مع رأس البر منذ اكثر من سبعه اعوام فلذلك كانت كانى ازورها للمره الاولى خصوصا بعد التغيرات الكبيره التى حدثت فى المدينه



سبب اخر قله العدد وان قد يراها البعض عيبا الا انها ميزه كبيره فى نفس الوقت فقله العدد تتيح لك التحدث والمناقشه مع كل المجموعه وتمنع الحلقات



معرفتى السابقه بكل الحاضريين لانى كنت سعيد الحظ واللقاء الاول الذى احضره لقاء المنصوره نوفمبر 2009 تعرفت على كل المجموعه فلم يكن هناك حاجز التعرف لاول مرة



كميه الضحك العجيبه اللى ضحكناها - ومحدش يقر علينا - كانت حاجه مميزه جدا فانا مضحكتش الضحك دا من زمان الحمد لله محصلش مفارقات عجيبه بس كان فيه جو مرح بمشاركه كل الموجودين



بالنسبه للناس



الفراشه الرقيقه ليساندرا

للمره التانيه باشوف ليساندرا يمكن اول مره اتكلمنا قليل جدا وقلنا ان شاء الله فى تجمع تانى نتكلم وقد كان الحمد لله

ليساندرا حد فنان جدا من جواه يعنى روحها حساسه جدا للجمال بتشوف الدنيا بعين جميله تلتقط ما لاتراه عيننا احنا العاديين

مرحه وعندها قابليه للتحمل سواء فى المشى - او الغلاسه - اصلى غلست عليها كتير بس تهريج طبعا والله يسامحهم اللى كانوا السبب

لها فكرها الخاص ووجهه نظرها الشخصيه فى كل شىء وتناقش وتحاور وطويله البال فى شرح ما تقصده تحديدا - ويمكن دى ملكه او موهبه او خبره مجال العمل جايز



ساره - رحيل

زى ما بحب اسميكى يا اختى العزيزه

ساره مش عارف اقول عنها ايه بس ساره دايما تحس انها اختك الافتراضيه

ساره بتسمع كويس يعنى عندها استعداد تسمعك وتديلك انتباها مهما كان الموضوع ممل صبوره يعنى

برضه عندها قوه تحمل للمشى ودى حاجه غريبه لانهن متعبوش بسهوله انا صراحه كنت باموت

اتناقشت مع ساره فى موضوع المشروع اللى بيشغلنى حاليا وسمعت منها وسمعت منى

كان ينقصنا حضور امجد القهوجى زوج ساره وامجد انسان جميل وحدوته تانيه ربنا يكرمه وييسر له الحال

ساره رفيقه درب التدوين سعدت جدا ان بحضورك



ضياء

ضياء للمره التانيه اشوفه بس المره الاولى اتكلمنا بس مش زى المره دى بجد كان نفسى جدا انى اشوفه تانى وفرحت اوى لما جه

ضياء شخص تحس طيبته من قبل ما تلمح طيفه يعنى وتحب جدا تتناقش معاه حتى لو هتختلفوا بس تحب تسمع طريقه تفكيره ووجهات نظره فى اى موضوع

ضياء من الناس اللى ممكن تهرج وهى شكلها جاد جدا بجمله بسيطه بس تموتك م الضحك

بجد شخص اعتز انى اتيحت لى الفرصه واتعرفت عليه واعتبره صديق كسبته من التدوين وصعب تلاقى حد زيه فى الزمن ده



ابراهيم العدوى

اخى الصغير فرق السن بينا مش صغير ومش كبير بس ابراهيم من الناس اللى قلبها ابيض ومن الناس اللى بتختصر المسافات بينك وبينها بسرعه فتشعر انك تعرفه من زمان

بيسمع لك كويس وبيهتم وبيسأل ابراهيم شايف انه موهبه هتكون لها مستقبل فى الصحافه والادب ان شاء الله

من الحاجات الجميله فى اليوم احساسى بفرحه ابراهيم اللى كانت ظاهره جدا



الى رفاق الرحله

ليساندرا

شكرا انك اتحتى لى الفرصه اشوف راس البر ودمياط بعينيك الجميله

يوم رائع لك الفضل فيه واقترح ان كل صيف يكون تجمع ليساندرا شىء اساسى



ساره

اختى العزيزه دعواتى لكى ولصاحبى امجد بالتوفيق وقريبا نفرح بيكم والتجمع الجاى تيجوا سوا ان شاء الله

ومش هانسى البطه بتاعتى وصيتك يا امجد واللى ياكل لوحده



ضيا

عارف المشوار كان صعب بس انت متعرفش قد ايه مجيك كان مؤثر جدا فى نفسى واحترامك للموعد ورغبتك فى انك تشوفنا دى بجد تقدير كبير منك وربنا يكرمك وييسر لك الخير ودمت صديقا



ابراهيم

شكلى هاشوفك كتير يا هيما سعدت بالرحله اللى بدأناها سوا من المنصوره حتى عدنا بسلام

اتمنى يا ابراهيم انك تستخدم طاقاتك فى العمل لموهبتك عشان اشوفك قريب محقق كل اللى تتمناه بمشيئه ربنا



------------

فيه كام لقطه ظريفه ومميزه فى اليوم

مكالمات التليفون

بدأت بمكالمه أمجد القهوجى

مكالمه اسعدتنى جدا جدا وشكرا يا امجد على ذوقك

داليا قوس قزح

داليا من الناس اللى باعزهم رغم ان ماتقبلناش غير مره واحده بس بجد باحترمها جدا وباعزها وكان نفسى تكون موجوده

شكرا جدا يا داليا

ايناس - بورسعيد

مكالمه ايناس فيها من الذوق ما يكفى بلد فايناس لم اقابلها من قبل ولا نعرف بعض تدوينيا ولكنها اصرت على ان تكلم كل الموجوديين شكرا ايناس على ذوقك وربنا يكرمك
--------------
أول مره فى حياتى أشوف سته يدخلوا مطعم يطلبوا نفس الساندويتش
الرحله لراس البر ودمياط رجعت لى ذكريات كتير منها ذكريات مع اصحابى ايام الجامعه ومنها ذكريات فى شغلى اللى كان قبل شغلى الحالى
وأول مره أعرف ان دمياط كرويه يا لساندرا
أول مره أحس انه تجمع بنكهه الرحلات

-----------
مره اخيره شكرا ليساندرا ولكل اللى مقدروش يجوا نأسف ونتمنى لكم حظ أفض المره القادمه وبجد لو سمعتوا اسم ليساندرا أو تجمع رأس البر متفكروش وفورا متضيعوش الفرصه هتعيشوا يوم مش هيتكرر

ملحوظه مهمه:

هوا انا مناخيرى حمره؟؟؟

11 comments:

Lyssandra said...

صباح الخير :)

بجد انا مش عارفة أقول حاجه بعد الكلام ده
شكراً يا محمد لليوم الطيّب
ولكلامك الطيّب بردو :)
والوصف الجميل المختلف

رأيك بجد أنا سعيدة بيه
وسعيدة ان اليوم كان بالمستوي ده
حتي واحنا مجموعه صغيرة .. ده مايمنعش انه كان لقاء ناجح جداً :)

الناس اللي قالت هاتيجي ومش جت فعلاً ظروفها ماكانش ينفع التحايل عليها :) وانا مش زعلانه منهم .. أنا زعلانه ليهم
بس تعرف لو كنا مجموعه كبيرة ماكناش هانعرف نتحرك كده

------------
هو انا مناخيري حمرا .؟
هههههههههههههههههه
انت لسه فاكر ؟ كلنا هذا الرجل


بجد اليوم ده فرق معايا كتير أوي
وسعيدة بيه جدا جدا
وعارفة انه مش سهل تكراره تاني

شكراً لكل شئ يا محمد

تحياتي
Lyssa

الحب الجميل said...

صباح الخير

أزيك يا استاذ محمد

جميل اوى وصفك للقاء رأس الببر

كان نفسى اكون فى الصحبه الطيبه بس اعمل ايه المكان بعيد
معليش تتعوض المره الجايه

بس ياااريت المره الجايه يكون فى اليكس

ونتعرف على الناس الطيبه الجميله اللى اتكلمت عنها ووصفتها وصف طيوب

ربنا يسعد ايامك

دمت فى حفظ الرحمن

rack-yourminds said...

الاخ الغالي محمد

بجد كنت اتمني اكون معاكم وعلي فكره انا فكرت في كده بس ظروفي بجد منعتني
يلا بقي يمكن تتعدل المرات الجايه
--------
في امان الله

فاتيما said...

الحمدلله
انكم انبسطتوا


كل وصف كتبته يليق بأصحابه بالفعل
و ربنا يجمعنا دايما ف الخير و الفرحة


عقبال كل مرة
بس آبقى فيها
لأخفيهااااااااا
هه

حمدلله ع السلامة

أم الخــلـود said...

اصحى يا نايم ووحد الدايم

(حملة الجسد الواحد)

أرجوا من المدونين الموقرين أن يضعوا شعار الحملة واسمها فقط فوقها (حملة الجسد الواحد) في الشريط الجانبي لمدوناتهم كدلالة على وحدة صف أمة محمد، ومن أجل قيام الولايات المتحدة الإسلامية

لمزيد من المعلومات

http://dndanh111.blogspot.com/2010/06/blog-post_14.html

جعله الله في ميزان حسناتكم .. آمين

كاتب مصري said...

فعلا كان يوم رائح جدا يا محمد
انت شخص جميل جدا وروحك حلوة ومرح واندمجت معاك بسرعة كبيرة جدا
يدوم الود لأهل الود
ربنا يكتر من ضحكك في الخير يارب
الي مجوش ربنا معاهم باه هههههههههه
بجد خسروا

رحــــيـل said...

انا كنت ناوية اسمي البوست ذوي الانوف الحمراء
----------
كان يوم رائع فعلا وصحبة اروع
وانا وسما محسناش بالمشى غير لما رجعنا بيوتنا

انا كمان كل مكالمات التليفون فرحتي خصوصا الناس اللى افتقدتها

وان شاء الله نتجمع دايما على خير

فتاه من الصعيد said...

لقاء موفق... ويا رب تعيدوه تاني

تحياتي

rack-yourminds said...

الاخ الغالي رحلة البحت

انا جيت بس اسلم واطمن

في امان االله

rack-yourminds said...

الاخ الغالي

مفيش جديد يعني؟

في امان الله

بت خيخة وأي كلام said...

ازيك يا محمد

انا جاية اسلم عليك


انا بعد اذنك خدت قصيدة ساعات بضحك ونشرتها عندى فى المدونة على جنب
فى السايد بار
تحت بند
اخترت لكم


محمد من فضلك انا عايزة رقم تليفونك فى السعودية


ممكن لو شوفت تعليقى ده
تسيبلى رقمك عندى فى المدونة
فى تعليق مش للنشر


سلام
اختك خيخة