Friday, July 09, 2010

ساعات باضحك


ساعات بأضحك

وأكمل ضحك

على روحى

فبتألم
---
تقوم روحى

تقول روحى

يا ضحكه راسمها

بالعافيه

لا هى صافيه

ولا دافيه

فروحى إمشى
---
ما أصل العيب

مهوش فيكى

أنا عارف

مكان العيب

مكان العيب

دا فى ملامحى

فعندك مثلا

الفرحه

فلو فرضا

انا فرحان
---
على وشى

ما تركبشى
---
بعكس الحزن

بيليق لى

ولو حتى

منيش حزنان
----
ونظره حزن

فى عيونى

طبيعيه

بشكل جنان
---
ولما حاولت

أتبسم

وأجرب بسمه

والتانيه

تعب وشى

من التجريب

ولكن برضه

ما لقيتشى
--
فقلت لنفسى

واتعجبت

صراحه ما أسهل

الاحزان

سالت نفسى

لما تعبت

ليه الحزن

بيليق لى

وليه الفرح

ما يليقشى
---
وليه الحزن

عمره طويل

وليه الفرح

عمره قصير

سنين الدنيا

تحمل فيه

ولو ولدت

ما بيعيشى
---
وانا صغير

قالوا لى زمان

بدون اسباب

ما تضحكشى
---
ماعرفوش ان

لما اكبر

وحتى لو لقيت

اسباب تضحكنى

ما هاضحكشى
---
لأن الضحك

راح ولى

فى سكه اللى

يروح فيها

يضيع ويتوه

ما يرجعشى
---
أنا اللى الحزن

أدبنى وربانى

وكان ليا

رفيق دربى

ومها زمانى

يوم دار بى

سنين عشره

أصيل والعشره

ما تهونشى
---
ساعات أضحك

وأغنى ومش بعيد

أرقص

تشوفنى الناس

تقول فرحان

بيتنطط

دا قام يرقص

ما هو الجاهل

ما يعرفشى
---
ولا فاهم ولا فاكر

كما قال

من زمان شاعر

انا بارقص

كطير مدبوح

يفرفر وحده

وسط سكوت

وبيسلم

خلاص الروح

دى مش رقصه

حياه لأه

دى رقصه

موت
---
فعذر لم أعد أضحك

يا اخوانا ومعلشى
---
منيش هاضحك

ولا راسم لا بالعافيه

ولا غيرها على وشى
---
يا إما الضحك

يدخل لى من الابواب

يا اما هاقفل الشباك

واقوله خلاص

ما يلزمشى

13 comments:

فاتيما said...

ما يلزمشى دا إيه ؟!!!

لأ بقى
يلزم

يا خرااااااااشى
يا محمد


حلوة قوى
و حزينة قوى


اما العنوان
ساعات باضحك

ساعات ايه بقى
دا القصيدة كلها حزن
و توعد للضحك
لو هوب ناحيتك
يا شيخ !!


ربنا يسعد ايامك كلها



حلوة قوى يا محمد

الحب الجميل said...

السلام عليكم

ان شاء الله دنيتك تكون كلها ابتسامه جميله
أجمل مافى كلماتك الاحساس الصادق الذى يصل للقلب

كثير منا ساعات بيضحك والضحكه لا تعلو الوجه فتختفى دائما بالحزن

بوست جميل ومعبر وأثر فيا

تسلم ايدك يااستاذ محمد

تحياتى
الحب الجميل

رحلة البحث said...

فاتيما
يا رافعه معنوياتى
يا محببانى فى التدوين
دى اخر حاجه كتبتها
وانا هائم على وجهى فى الصحرا المره اللى فاتت
نزلتها ورجعت نزلتها النهارده تانى
لانها صراحه عجبانى
وحاسسها بتتكلم عنى بجد
اصل انا باضحك كتير من بره
ههههههههههههه
كويس انها عجبتك
وشكرا يا رافعه معنوياتى
----------
الحب الجميل
وعليكم السلام ورحمه الله
جميل ان الاحساس وصلك
ومش مبسوط انك اتاثرتى بيها
اصل بازعل لما اكتب حاجه كئيبه والاقى حد بيقول انها عبرت عنه او انها لمسته او اتاثر بيها
بس اعمل ايه طول عمرى كئيب
والله باحاول اكتب حاجات مفرحه بس بتبقى نوادر حظكم معايا كده
عشانكم احاول اكتب حاجه مفرحه المره الجايه بس لما دماغى تشتغل تانى بقى
دعواتكم

حفيدة عرابى said...

كنت مرة سمعت ان الصمت فى حرم الجمال جمال
فانا احتراما منى للجمال ده
هاسكت خالص

شفـقــة و إحســــان said...

جميلة اوى بس عموما الضحك مش بفلوس اضحك يا عم محدش واخد منها حاجة

رحلة البحث said...

حفيده عرابى
يا فندم والسكوت ابلغ من اى كلام
ولو انى الجمله كبيره عليا
شكرا لمرورك وتحياتى
-------------
شفقه واحسان
والله يا فندم بنضحك
بس مش م القلب اوى
ادعى لنا الضحكه تخرج م القلب

موجة said...

يا إما الضحك

يدخل لى من الابواب

يا اما هاقفل الشباك

واقوله خلاص

ما يلزمشى

قصيدة روووعة الرووعة
خالص تحياتي
موجة

ندى الياسمين said...

حلوه حلوه حلوه يا محمد

عجبتنى اوي بجد
مجرررررررمه معانيها وكلماتها
وطريقة السرد فظيييييييييعه

بجد عجبتنى اوووووي

تسلم اديك

rack-yourminds said...

الاخ الغالي ازيك اتمني تكون بالف خير

البوست ده اتنشر قبل كده بس كويس انك كررته لانه بجد رااائع برغم نبرة الحزن الساكنه في كلماته

الاخ الغالي اسعد الله ايامك وابعد عنك الاحزان

-----------

في امان الله

sony2000 said...

بجد جميله جدا
تسلم:)

ستيتة حسب الله الحمش said...

جميلة قوي
ومناسبة قوي

ماعرفوش ان

لما اكبر

وحتى لو لقيت

اسباب تضحكنى

ما هاضحكشى

عارف منى زكي في عن العشق والهوي لما قالت
أنا زعلانة قوي من الدنيا

انا كمان زعلانة قوي من الدنيا
وناس الدنيا
بس على طوووووووووول بضحك

فتاه من الصعيد said...

ليه بس كده :(

الفرح لازم للقلب وإلا نموت

يمكن الحزن تأثيره أقوى وبيستمر كتير .... لكن لحظه فرح بتنسينا كل الحزن

وعلى فكره السعاده محتاجه استعداد نفسي

تحياتي

حنان الشافعي said...

جميلة

:)


تقبل مروري وتحياتي
:)