Monday, July 12, 2010

لقاء رأس البر - يوم على جناح فراشه


من الصعب جدا ان تحظى بيوم غير اعتيادى فى حياتك الروتينيه الممله

لقاء راس البر هى ساعات مميزه وغير عاديه فى حياة معظم من حضروا اللقاء ابراهيم العدوى قد وصف اليوم بكل الكلمات الجميله وباسلوب اديب ماهر لذلك من الصعب مجاراته واعاده وصف اليوم الجميل

ساره رحيل سردت لحظات اللقاء لحظه بلحظه ناقله كل التفاصيل الصغيره وكأنها حملت كل من لم يأتى على كفيها معنا طوال الرحله

ليساندرا الرائعه تصر على ان يكون بوستها الاخير ولها ذلك بالتأكيد فهى صاحبه الفرح وأم العروس

لا أعرف ماذا أكتب تحديدا ولكن سأطلق عليكم دماغى وانتوا ونصيبكم بقى

اللقاء بالنسبه لى بدأ التفكير فيه من اول يوم اعلنت ليساندرا عن رغبتها فى تنظيم لقاء رأس البر

اللقاء منذ بدايته غير اعتيادى

اختيار المكان فكره جديده مدينه مصيف تختلف عن الاسكندريه فى كونها مصيف فقط واعتقد انها المره الاولى فى لقاءات المدونين

الميعاد تم النزاع على الميعاد لوقت طويل وصراحه انا الوم كل من قال انه سيأتى ولم يفعل وكل من تدخل فى تغيير الموعد ولم يوفى بوعده ولكن عزاء ليساندرا فى ذلك ان كل من لم يأتى خسر وقت مميز جدا



من الاسباب التى جعلت هذا اللقاء مختلفا
انه كان لقاء متجولا اكثر منه قعده وصراحه فانا علاقتى كانت قد قطعت مع رأس البر منذ اكثر من سبعه اعوام فلذلك كانت كانى ازورها للمره الاولى خصوصا بعد التغيرات الكبيره التى حدثت فى المدينه



سبب اخر قله العدد وان قد يراها البعض عيبا الا انها ميزه كبيره فى نفس الوقت فقله العدد تتيح لك التحدث والمناقشه مع كل المجموعه وتمنع الحلقات



معرفتى السابقه بكل الحاضريين لانى كنت سعيد الحظ واللقاء الاول الذى احضره لقاء المنصوره نوفمبر 2009 تعرفت على كل المجموعه فلم يكن هناك حاجز التعرف لاول مرة



كميه الضحك العجيبه اللى ضحكناها - ومحدش يقر علينا - كانت حاجه مميزه جدا فانا مضحكتش الضحك دا من زمان الحمد لله محصلش مفارقات عجيبه بس كان فيه جو مرح بمشاركه كل الموجودين



بالنسبه للناس



الفراشه الرقيقه ليساندرا

للمره التانيه باشوف ليساندرا يمكن اول مره اتكلمنا قليل جدا وقلنا ان شاء الله فى تجمع تانى نتكلم وقد كان الحمد لله

ليساندرا حد فنان جدا من جواه يعنى روحها حساسه جدا للجمال بتشوف الدنيا بعين جميله تلتقط ما لاتراه عيننا احنا العاديين

مرحه وعندها قابليه للتحمل سواء فى المشى - او الغلاسه - اصلى غلست عليها كتير بس تهريج طبعا والله يسامحهم اللى كانوا السبب

لها فكرها الخاص ووجهه نظرها الشخصيه فى كل شىء وتناقش وتحاور وطويله البال فى شرح ما تقصده تحديدا - ويمكن دى ملكه او موهبه او خبره مجال العمل جايز



ساره - رحيل

زى ما بحب اسميكى يا اختى العزيزه

ساره مش عارف اقول عنها ايه بس ساره دايما تحس انها اختك الافتراضيه

ساره بتسمع كويس يعنى عندها استعداد تسمعك وتديلك انتباها مهما كان الموضوع ممل صبوره يعنى

برضه عندها قوه تحمل للمشى ودى حاجه غريبه لانهن متعبوش بسهوله انا صراحه كنت باموت

اتناقشت مع ساره فى موضوع المشروع اللى بيشغلنى حاليا وسمعت منها وسمعت منى

كان ينقصنا حضور امجد القهوجى زوج ساره وامجد انسان جميل وحدوته تانيه ربنا يكرمه وييسر له الحال

ساره رفيقه درب التدوين سعدت جدا ان بحضورك



ضياء

ضياء للمره التانيه اشوفه بس المره الاولى اتكلمنا بس مش زى المره دى بجد كان نفسى جدا انى اشوفه تانى وفرحت اوى لما جه

ضياء شخص تحس طيبته من قبل ما تلمح طيفه يعنى وتحب جدا تتناقش معاه حتى لو هتختلفوا بس تحب تسمع طريقه تفكيره ووجهات نظره فى اى موضوع

ضياء من الناس اللى ممكن تهرج وهى شكلها جاد جدا بجمله بسيطه بس تموتك م الضحك

بجد شخص اعتز انى اتيحت لى الفرصه واتعرفت عليه واعتبره صديق كسبته من التدوين وصعب تلاقى حد زيه فى الزمن ده



ابراهيم العدوى

اخى الصغير فرق السن بينا مش صغير ومش كبير بس ابراهيم من الناس اللى قلبها ابيض ومن الناس اللى بتختصر المسافات بينك وبينها بسرعه فتشعر انك تعرفه من زمان

بيسمع لك كويس وبيهتم وبيسأل ابراهيم شايف انه موهبه هتكون لها مستقبل فى الصحافه والادب ان شاء الله

من الحاجات الجميله فى اليوم احساسى بفرحه ابراهيم اللى كانت ظاهره جدا



الى رفاق الرحله

ليساندرا

شكرا انك اتحتى لى الفرصه اشوف راس البر ودمياط بعينيك الجميله

يوم رائع لك الفضل فيه واقترح ان كل صيف يكون تجمع ليساندرا شىء اساسى



ساره

اختى العزيزه دعواتى لكى ولصاحبى امجد بالتوفيق وقريبا نفرح بيكم والتجمع الجاى تيجوا سوا ان شاء الله

ومش هانسى البطه بتاعتى وصيتك يا امجد واللى ياكل لوحده



ضيا

عارف المشوار كان صعب بس انت متعرفش قد ايه مجيك كان مؤثر جدا فى نفسى واحترامك للموعد ورغبتك فى انك تشوفنا دى بجد تقدير كبير منك وربنا يكرمك وييسر لك الخير ودمت صديقا



ابراهيم

شكلى هاشوفك كتير يا هيما سعدت بالرحله اللى بدأناها سوا من المنصوره حتى عدنا بسلام

اتمنى يا ابراهيم انك تستخدم طاقاتك فى العمل لموهبتك عشان اشوفك قريب محقق كل اللى تتمناه بمشيئه ربنا



------------

فيه كام لقطه ظريفه ومميزه فى اليوم

مكالمات التليفون

بدأت بمكالمه أمجد القهوجى

مكالمه اسعدتنى جدا جدا وشكرا يا امجد على ذوقك

داليا قوس قزح

داليا من الناس اللى باعزهم رغم ان ماتقبلناش غير مره واحده بس بجد باحترمها جدا وباعزها وكان نفسى تكون موجوده

شكرا جدا يا داليا

ايناس - بورسعيد

مكالمه ايناس فيها من الذوق ما يكفى بلد فايناس لم اقابلها من قبل ولا نعرف بعض تدوينيا ولكنها اصرت على ان تكلم كل الموجوديين شكرا ايناس على ذوقك وربنا يكرمك
--------------
أول مره فى حياتى أشوف سته يدخلوا مطعم يطلبوا نفس الساندويتش
الرحله لراس البر ودمياط رجعت لى ذكريات كتير منها ذكريات مع اصحابى ايام الجامعه ومنها ذكريات فى شغلى اللى كان قبل شغلى الحالى
وأول مره أعرف ان دمياط كرويه يا لساندرا
أول مره أحس انه تجمع بنكهه الرحلات

-----------
مره اخيره شكرا ليساندرا ولكل اللى مقدروش يجوا نأسف ونتمنى لكم حظ أفض المره القادمه وبجد لو سمعتوا اسم ليساندرا أو تجمع رأس البر متفكروش وفورا متضيعوش الفرصه هتعيشوا يوم مش هيتكرر

ملحوظه مهمه:

هوا انا مناخيرى حمره؟؟؟

Friday, July 09, 2010

ساعات باضحك


ساعات بأضحك

وأكمل ضحك

على روحى

فبتألم
---
تقوم روحى

تقول روحى

يا ضحكه راسمها

بالعافيه

لا هى صافيه

ولا دافيه

فروحى إمشى
---
ما أصل العيب

مهوش فيكى

أنا عارف

مكان العيب

مكان العيب

دا فى ملامحى

فعندك مثلا

الفرحه

فلو فرضا

انا فرحان
---
على وشى

ما تركبشى
---
بعكس الحزن

بيليق لى

ولو حتى

منيش حزنان
----
ونظره حزن

فى عيونى

طبيعيه

بشكل جنان
---
ولما حاولت

أتبسم

وأجرب بسمه

والتانيه

تعب وشى

من التجريب

ولكن برضه

ما لقيتشى
--
فقلت لنفسى

واتعجبت

صراحه ما أسهل

الاحزان

سالت نفسى

لما تعبت

ليه الحزن

بيليق لى

وليه الفرح

ما يليقشى
---
وليه الحزن

عمره طويل

وليه الفرح

عمره قصير

سنين الدنيا

تحمل فيه

ولو ولدت

ما بيعيشى
---
وانا صغير

قالوا لى زمان

بدون اسباب

ما تضحكشى
---
ماعرفوش ان

لما اكبر

وحتى لو لقيت

اسباب تضحكنى

ما هاضحكشى
---
لأن الضحك

راح ولى

فى سكه اللى

يروح فيها

يضيع ويتوه

ما يرجعشى
---
أنا اللى الحزن

أدبنى وربانى

وكان ليا

رفيق دربى

ومها زمانى

يوم دار بى

سنين عشره

أصيل والعشره

ما تهونشى
---
ساعات أضحك

وأغنى ومش بعيد

أرقص

تشوفنى الناس

تقول فرحان

بيتنطط

دا قام يرقص

ما هو الجاهل

ما يعرفشى
---
ولا فاهم ولا فاكر

كما قال

من زمان شاعر

انا بارقص

كطير مدبوح

يفرفر وحده

وسط سكوت

وبيسلم

خلاص الروح

دى مش رقصه

حياه لأه

دى رقصه

موت
---
فعذر لم أعد أضحك

يا اخوانا ومعلشى
---
منيش هاضحك

ولا راسم لا بالعافيه

ولا غيرها على وشى
---
يا إما الضحك

يدخل لى من الابواب

يا اما هاقفل الشباك

واقوله خلاص

ما يلزمشى

Saturday, July 03, 2010

Bloggers Blood Bank - الانتقال



ابتداء من اليوم هيتم الانتقال بالمشاركه والمناقشه على المدونه الرئيسيه للمشروع

أعاود بالتذكير بالايميل الخاص بالمشروع


رجاء من كل اخواتى اللى نشر لينك عنده او هينشر ياريت يكون بلينك مدونه البنك وليس مدونتى الشخصيه

أشوفكم هناك

Bloggers Blood Bank (3rd post)

Bloggers Blood Bank (3rd Post)



بادىء ذى بدء أدين بالاعتذار لاستاذتى العزيزه دكتور ستيته لانى أصابنى الاحباط فى مرحله ما وأشكر لها تعليقها الذى أمدنى بالحماسه ثانيه والاصرار على تكمله المشروع مهما طال الوقت ومهما كان العدد قليل
ثانيا أود أن أشكر من تفاعلوا بجديه مع المشروع وترتيبهم من حيث الأسبقيه فى إريال بيانتهم و إبدائهم الرغبه فى المشاركه فى المشروع
دكتوره ستيته
فتاه من الصعيد
يوم جديد
منونه - واحد شاى
يبدو ان الرجاله ماتوا فى الحرب فعليا
--------------------------------
خلصنا المقدمه نتكلم شويه بقى
أسعدنى الحظ وحضرت التبرع الخيخى الأخير يوم السبت اللى فات وأسعدنى الحظ وقابلت مجموعه ظريفه جدا أعرف منهم أربعه شرفونا فى لقاء المنصوره شهر نوفمبر اللى فات وهم
خيخه - فاتيما - خالد همس الاحباب - محمد عسقول
صراحه كانت فرصه كويسه انى اتعرف على خيخه وفاتيما لان للاسف فى لقاء المنصوره لم تتح لى الفرصه انى اتكلم معاهم وفرحت جدا انى قدرت اتعرف عليهم واتكلم معاهم وبجد مش قادر اقول غير انى مبسوط اوى ان فى بلدنا شباب بالعقليات والهمه والاراده دى
باقى باشوفهم لاول مره
وليد وكمال ومصطفى وبشمهندس احمد كلهم ناس محترمه اوى وظراف جدا واتشرفت بمعرفتهم وان شاء الله نتقابل دايما
نيجى لاخيرا وليس اخرا
منونه درويش
كانت مفاجأه ليا انى الاقيها هناك وسعدت جدا بلقائها لانها يمكن هى وفاتيما اللى كان عندهم فكره عن المشروع كمان منونه حضرت توقيع كتاب ساره فى طنطا لكن لم اتعرف عليها للاسف
خلصنا من تفاصيل التبرع نيجى لنقطه مهمه
حضورى للتبرع دا جه فى وقته جدا لانى صراحه كنت محبط من عدم نجاح الفكره او انى كنت منتظر رد فعل قوى بس التبرع دا غير وجهه نظرى بشكل كبير احنا عددنا مكانش كبير صحيح بس الاستمراريه هى الاهم خيخه نجحت بفضل ربنا انها تخلى الحمله دى مستمر من 2008 حتى الان وان شاء الله دايما ودا المهم فى الموضوع
----------------------------------------
مش عارف اقول ايه عشان احمس الناس بس هاعيد نشر كومنت من جيجى والعالم على البوست اللى فات


جزاكم الله خيرا كثيييييرا حقيقى قطره دم تساوى حياه




امبارح شفت واحده عماله تزعق ومنهاره وتنادى فى كل مكان عايزه فصيله دم بي موجب لان اخوها محتاج تلات اكياس وهو بيعمل عمليه وقتها
احنا كنا رايحين مشوار فى مستشفى جنبها

خلصنا المشوار نزلنا لانها قاعده ادام المشرحه واخوها مات بعدها بحوالى ساعتين


ياريت بجد نساعد فى موضوع الدم ده ويامنا من كربات الزمن

جيجي والعالم

---------------------------
لهنا انتهى تعليق جيجى وبالنسبه لى لا تعليق

تعليق تانى من المدونه داليا وهى صحفيه

فكره كويسه بس عايزه شغل جامد جدا
ممكن اساعدكم بنشر الفكرة عندنا في جرنال الشروق بس انا محتاجه معلومات أكثر عن الحملة وكم واحد انضم ليها وما مستوى تنفبذها
يا ريت تبعلتي تفاصيل اكثر

مع احترامي
داليا
---------------------------
طبعا مش عارف هل شايفيين ان الحمله ممكن تقوم بأربعه؟
أعتقد لو كنت عملت بيج على الفيس بووك وجايز لو سميتها
بس يا سيدى وقامت متبرعه
يمكن كان انضم لها حتى لو خمسين واحد فى تلت ايام بلاش خمسين الف
--------------------------
أخيرا
محتاج مساعده اصدقائى المدونيين لتفعيل الفكره
نداء
خيخه
محتاجك معايا فى المشروع دا واعتقد ان فهمتك الفكره بايجاز اقرى التفاصيل بس بجد محتاج ارادتك وحماسك وزى ما انتى بتقولى على نفسك انك بتاعت تنفيذ محتاج لنشاطك وتصميمك دا معانا فى الفكره دى
--------------
خالد همس الاحباب
اخويا الكبير محتاج همساتك فى المشروع دا وانا عارف انك مش بتتأخر فى الخير
--------------
فاتيما
محتاج اعلان عندك يا فندم عشان ال 300 مدونه اللى فى السايد بار يعرفوا
-------------
ندى الياسمين
محتاج مجهودك يا صبرنى وانا عارف تواجدك فى التدوين وعارف انك بتحبى الخير
------------
ساره رحيل
وعد الحر دين عليه يا ساره
مستنى مشاركتك زى مشاركاتك بتاعت زمان
قولتى هتعلنى ومش اعلنتى
-----------
اخيرا بس بجد المره دى
مش هاتكلم عن اهميه التبرع ولا انقاذ حياه
لكن هاقول مش صعب يوم كل كام شهر تتبرع فيه بكيس دم
واعتبره ابتسامه فى وجه اخوك المريض
وعلى رأى فاتيما الواحد لما يبص فى استماره التبرع ويجيب ب لالالالا يعرف قد ايه ربنا انعم عليه وقد ايه ربنا معافيه من حاجات كتير
ربنا يديكوا الصحه ويمتعكم بيها وبعمركم
وجازاكم الله كل خير