مقدمه لابد منها
شكر خاص الى الأخت العزيزه شيما - الشعب لابد له من حكومه تشكمه - لانها من الهممتنى كتابه هذا البوست بعد قراءه بوست لها مميز جدا بعنوان سكر زياده
وشيما من المدونين اللذين اجد متعه حقيقيه فى متابعتهم كما انها على المستوى الشخصى وان لم يتح لى التعرف عليها الا مره واحده فى لقاء المدونيين بالمنصوره نوفمبر الماضى الا انها تترك فيك انطباع مميز من أول وهله عندما تتحدث معها فهى مرحه جدا كما تشع من وجهها امارات الجدعنه او كما يقولون تحس بإنها بنت بلد من أول كلمه تتكلمها معاها
تحياتى لاختى العزيزه لان بوستها كسر حاله الجمود التى لازمتنى اخر فتره
اعزائى المدونيين
هوا البوست غريب شويه ومش عارف اذا كانت فكرته هتوصل ولا لأ بس عموما لو موصلتش نبقى نحاول نوصلها ومن يلاحظ أى كسور فى الوزن أو عيوب فى القافيه فليعذرنى لانى ما صدقت اكتب
ساده
هوا ليه طعم الحياه
بقى مر ساده؟
رغم إنه كان زمان
سكر زياده
هوا ليه الفرح هاجر؟
خد معاه كل السعاده؟
**********
ولا قلبى أنا اللى مات
جوه دفتر ذكريات؟
والغلاف مرسوم عليه
قلب أحمر وحكايات
لون خدود ست البنات
وبصحيح العمر فات؟
**********
رغم إنى لسه شايف
نفسى طفل فى إعداديه
بس روحى مش لامسها
مش حاسسها هى هيا
**********
يعنى إيه؟؟
هوا عمرى بيتسرق؟؟
يعنى إيه؟؟
أحلامى حبر على الورق؟
يعنى إيه؟؟
حصان وباجرى فى السبق؟؟
كسبان أنا؟
خسران أنا؟
غرقان أنا؟
فى بحور عرق؟
**********
طب هى لسه
الشمس طالعه؟
طب لسه نورها
نور زمان؟
ولا أصبح ضى شمعه؟
يادوب منور المكان؟
هوا أنا طالب فى جامعه؟
واللى جنبى دى حنان؟
اللى كانت يوم حبيبتى
هوا أنا اللى سيبت ولا
يا حنان إنتى اللى سيبتى؟
********
ولا أنا فى كتفى شايل بندقيه
عسكرى واقف حراسه
بأقضى خدمه عسكريه؟
بس روحى لسه برضه
مش حاسسها هى هيا
**********
لا دا أنا خلصت جيش
ف إيدى شنطه مش خفيفه
فيها كوم اوراق وفيش
رايح أستلم الوظيفه
رايح أبدأ أكل عيش؟
**********
لأ دا أنا لسه لى شهر
بس وأطلع ع المعاش
هوا أنا اللى عشت عمرى؟؟
ولا حد غيرى عاش
هوا ليه حاسس حياتى
فجأه ضاعت و بلاش؟
عشتها وكأنى عايش
بس لسه ماعشتهاش
25 comments:
جميلة قوي
اندمجت معاها جدا
واضح ان اللون والطعم السادة مسيطرين على أجواء بلدنا المحروسة
بس بردو فرج ربنا قريب
يا مسهل يارب
عيشتني معاك ورغم اني لسه قدامي شوية على المعاش لكن حسيت بكل كلمة قلتها والله انا لسه امبارح بقول لقريبتي " تعرفي انا خايفة يقولولي تعالي تموتي عمرك خلص وانا لسه ماعشتوش ولاعملت فيه حاجة" أجي النهاردة الاقي البوست ده وكأني كنت بكلمك والله العظيم بكيتني
ManoOosh
اهلا بيكى والحمد لله انها عجبتك
وفعلا يبدو ان السواد مسيطر لدرجه انى كل ما ادخل مدونه الاقى كل كاتب نفس الفكره ولكن باسلوب مختلف
وربنا يفرجها على كل الناس ان شاء الله
خواطر شابه
اهلا بحضرتك
زياره عزيزه وتعليق ترك فى أجل الأثر
ويكفينى اعتزازا ان كلماتى الضعيفه اعجبتك وتركت فيكى اثرا وان هناك توارد خواطر رغم عدم سابق المعرفه الشخصيه وبعد المسافات ولكن يبدو ان هم الانسان واحد مهما اختلف الزمنا والمكان وادعو الله ان يفرج كل كرب اخواننا
ولك بشكل خاص ادعو لك بالسعاده والصحه وان يرزقك الله نعمه الاستمتاع بالحياه والعمر الطويل
ملحوظه
لسه كتير اوى يا فندم على سن المعاش
حفيد الغرباوى
اهلين وسهلين نورت شو ها الغيبه
اولا هابى فالنتين داى
وبعدين انت برده موش قلتلى بتقبض كام ياشنغهاى كنت عاوزه احجزلك بنتى بس يلا بقى ابقى خد حفيدتى ماهو طبيعى على بال ماتخلص وتكون نفسك فى الشغل اللى هتشتغله شهر وتطلع معاش دا يبقى تدور على الاحفاد بقى
ابياتك الشعريه قصيره اوى بس معبره اوى بجد يامحمد وكمان بتعبر عن معاناه اجيال زيى وزيك
ربنا معاهم
sookra
اهلا اهلا اهلا بابله سوسو
يا خبر ابيض ازيك اخبارك ايه؟
معلش انا ندل ومش باسال انا عارف بس كنت مقاطع التدوين لفتره كده
المهم يا ستى ازاى كان ع القبض تقدرى تقولى باقبض كام كووك دوور مش كام شنغهاى
هوا جايبنا ورا غير كلامكم ده دا الفيلد كله بيجيب ضلف يا ابله ربنا يستر ههههه
والله يا ابله انا يشرفنى ان يكون اللى بكتبه ده غلى رغم عدم جودته الفنيه ان تكونى شايفه ان بيعبر عن جيلنا يا سلام هوا نا اطول اعبر عن جيل سعادتك دا حتى الجيل دا كان وشه حلو على مصر ههههههه
يعنى إيه؟؟
عمرى إتسرق؟؟
يعنى إيه؟؟
أحلامى حبر ع الورق؟
يعنى إيه؟؟
حصان وباجرى فى السبق؟؟
طيب كسبت؟
طيب خسرت؟
ولا غرقت؟
فى بحور عرق؟
طب هى لسه
الشمس طالعه؟
طب نورها لسه
نور زمان؟
ولا أصبح
ضى شمعه؟
يادوب منور المكان؟
حلوه اوىىىىىىىىىىىى يامحمد يانهارى لسمتنى موووووووووووووووووت
بجد حلوه اوىىىى...
واضح ان فى شوطه للشباب المصرى او حد دعى علينا وقال روحوا اللهى تحسوها ساده:)
انت فييييييييييييينك قلقتنا عليك من اخر بوست والله ,
عماله اقول لنفسى اختفى كده ليه؟؟
الحمد لله انك كويس,
متبقاش تغيب كده
وبعدين ايه الكلام الحلو داا ,,
لالالا كتير عليا ياكزوفى ياكزوفى:)
وكمان انا اللى خرجتك من حالة الجمود يانهارى هيغمن عليا من الفرحه,
مش مصدقه نفسويتى,طب هات اوبع جنيه باه..
انا والله مبسوطه جداا انى عرفتك ومستنينك لما تنزل ان شاء الله.
عزيزتى شيما
ازيك اخبارك ايه؟
يارب تكونى بخير دايما
مبسوط جدا انها عجبتك الحمد لله
بالنسبه للشباب يبدو فعلا ان فصل الشتا دا كان فيه فيروس فى الجو بيصيب الشباب بس بالاكتئاب بس عادى دا الاكتئاب اصله بقى غيه ومزاج هههههه
بالنسبه للغياب فانا ياستى مازلت حى ارزق واكل عيش الحمد لله مع شرزمه فى الصحارى والبرارى هائميين على وجوهنا ههههه
لا مفيش كنت مقفول شويه من التدوين وبصراحه كل شويه باتقفل اكتر ان فاهمه بقى
بالنسبه للكلام عنك
فيا فندم اى خدمه ولو انى مقولتش حاجه دا احقاقا للحق بس لانى فعلا كنت باعصر فى دماغى ومفيش فايده لحد ما قريت البوست بتاعك الجميل فبدأت اكتب وشكرا للمره التانيه على التوازى اهو
والاوبع جنيه اى خدمه بس عاوزاه ورق ولا فضه
وياريت يكون فيه لقاء قريب لانى نازل كمان عشر ايام ونفسى فعلا اشوف مدونيين المنصوره الظراف المحترميين الذوق الجدعان كل المدونيين كويسيين بس المنصوره طبعا شكل تانى اكاليم اه ويارب ديمها علينا نعمه
على خير نلتقى بإذن الله
انت حسستنى انى عندى سبعين سنة مرة واحدة
بس هو مين اللى ساب التانى
عيسوى بك الكبير
ازيك يا فندم
بعد الشر عليك يا باشا دا انت طول عمرك هتفضل عشرين سنه بس والشباب شباب القلب وانت فاهم
اما مين ساب التانى
فانا عمرى ما عرفت حد اسمه حنان بس القافيه بتحكم بس عموما انا اللى باتساب على طول ههههههه
موش هعلق لان دى اول مرة ادخل هنا
عشان كده هدخل بس اسلم
وتقبل مرورى
اللى مش عارف يتغير
الله يسلمك بس كنت قعدت اخد اى حاجه م البلوج شاى قهوه جنزبيل
يعنى هتيجى وتمشى كده فاضى ميصحش
يااااااااااااااااااااه اخيرا رجعت من رحله البحث انا اللى اشكر صاحبه مدونه الشعب لابد له من حكومه تشكمه لانها رجعتك لنا واطمنا عليك
المؤلم فى البوست انه حقيقى كلنا جوانا نفس الالاسئله والمؤلم اكتر ان
الصرخه من شباب لسه فى بدايه حياتهم ان شاء الله بكره يبقى سكر زياده
وطول ما الدفتر مرسوم عليه حكايات بلون خدود ست البنات يبقى اكيد فجر فرح الايام الجايه ات
تحياتى وما تغبش عنا كتيير
عطش الصبار
والدتى العزيزه اشكرك على زيارتك الجميله التى انتظرها دوما كلما اكتب لاعرف رايك فى ما كتبت
والله يا ماما الامل موجود لكن للاسف الاحباط مسيطر اكثر وعمل غشاوه على عنينا مخلينا يادوب شايفين طرف ديل احلامنا لكن عموما انا الحمد لله تمام متقلقيش بس التدوين بقى فيه شويه تغيير مخليانى مش باتابع زى زمان
متشكر جدا على زيارتك اللى دوا باتشرف بيها
انا عايزه اشكرك على انك بتنادينى باجمل لقب ويارب اكون قد اللقب ده
أمى عطش الصبار
اولا انا من يزداد شرفا لو تقبلى حضرتك اناديكى بامى
وليس هذا من فراغ فلقد لمست مدى حب ابنائك لكى من كلامهم عنكى
سواء روزا او ابن حضرتك لما كان مسافر
فاحسبك من الامهات المثاليه وهذا ليس مبالغه ولكنها حقيقه
ثانيا فانا عاشق للام المصريه المضحيه المربيه الحنون خصوصا جيل حضرتك وهو جيل امى عافاها الله وشفاها التى بسببها تعلمت ان احترم المرأه وانا اعشق الام المصريه على وجه الخصوص
ودمتى بخير وصحه وسعاده امى العزيزه
السلام عليكم
بجد كلامك فسر الحياه...فعلا عمرنا بيتسرق
وأحيانا .. بيضيع من غير ما نعرف إحنا عملنا اللى عاوزينه ولا لاء بتبقي حيره
بس أجمل حاجه إن اللى ميعرفش يحقق حلمه يكتبه حتى يكون ذكرى جميله ليه..أو يكون عمل بحلمه حاجه وخلاص
أسعدنى مرورى في مدونتك
تحياتى
الله عليك
بجد بجد الله عليك
كلامك حسيته اوى وبينطق بلسان حال كتيررر اوى مننا
جميلة جدا كلماتك
ربنا يوفقك دايما
اول زيارة ليا وان شاء الله تتكرر
تحيةوسلام
حلوة قوي القصيدة وروحها
حلو المقطع ده قوي ولامسني
رغم إنى لسه شايف
نفسى طفل فى إعداديه
بس روحى مش لامسها
مش حاسسها هى هيا
**********
يعنى إيه؟؟
هوا عمرى بيتسرق؟؟
يعنى إيه؟؟
أحلامى حبر على الورق؟
يعنى إيه؟؟
ميرسي جدا على سؤالك
ادعيلي ارجع اكتب تاني
حلمى البعيد
اهلا وسهلا يا فندم للمره الاولى ويارب ما تكون الاخيره
يمكن اكون اصبت فى وصف بعض مشاعر البشر لكن اكيد صعب تفسير الحياه ولا حد بيوصل ابدا الى ماهيه الحياه الا اذا اعتبرناها فتره انتقاليه بين الولاده والحياه الاخره ومشغلناش بالنا بيها خالص ولكن الانسان دوما بينسى المعلومه دى وبالتالى بيفضل شاغل باله فى تفسير الحياه ومش بيوصل لشىء
نورتينى يا فندم
Ms Venus
متشكر جدا ليكى
وسعيد ان البوست عجبك
واتمنى تشاركينى الرأى دوما على ما اكتب
ونورتينى
وسام قابيل
انتى فين تصدقى مصدقتش نفسى
شكرا وسام على وجودك فى مدونتى وارجعى اكتبر تانى وبلاش تغيبى بجد بافتقد وجودك
اتمني في يوم ان تتحول من ساده الي حتي علي الريحه مش حقول مظبوطه
بس هل حشوف اليوم ده
بجد
الله ينور
هوا ليه طعم الحياه
بقى مر ساده؟
رغم إنه كان زمان
سكر زياده
هوا ليه الفرح هاجر؟
خد معاه كل السعاده؟
الله
طب هى لسه
الشمس طالعه؟
طب لسه نورها
نور زمان؟
ولا أصبح ضى شمعه؟
فكر عااالي جدااااا
هوا أنا اللى عشت عمرى؟؟
ولا حد غيرى عاش
هوا ليه حاسس حياتى
فجأه ضاعت و بلاش؟
عشتها وكأنى عايش
بس لسه ماعشتهاش
نهاية راااائعة فعلا
كتاباتك متميزة جدا وتتسم بالسلاسة مع الجودة ورقي الاحساس
حتى في ياما ليه؟
البداية أصلا انك بتعاتب أمك
ودي أحسن في رأيي وأرق من عتاب الحبيبة
عتاب مؤدب وهاديء مع اليقين بأنك لا تستطيع تركها
أعجبت جدا بالشعر عالي الجدة دا يا فندم
سعدت جدااا
هبة
فعلا بجد تعبيرات رائعة جداً
الايام بتعدي والعمر معاها بيعدي
واحنا لسه زي ما احنا
قصيدة بجد رائعة وتعبيراتها جامدة جداً
لأمام
Post a Comment