Saturday, November 27, 2010

بقايا الحلم

بقايا الحلم




فى علبه قطيفه
قام لملم
بقايا الحلم
واستسلم
وربع ايده..
.واستنى
يجي له الموت
كده فى سكوت


***
ماهو عايش
بقاله كتير
يبوس ف ايدين
سنين عمره
ويتمنى
تمر ببطأ
فتعانده
و من ايده

بسرعه تفوت
***


فيتحسر
على الحلم
اللى كان اكبر
فضل يصغر
ويتفتت
ويتشتت
فى ميت سكه


***
بقى حلمه
ف يوم يفرح
بقى حلمه
يادوب ضحكه
ف كلمه حب
تتقال له
ولو بالكدب
بقى حلمه
ف يوم يتحب
بقى حلمه
يبطل انه يتألم
ولكن كلها احلام


***
فقام سلم
وقام لملم
بقايا الحلم
واستسلم
وربع ايده
واستنى
يجى له الموت

Thursday, November 18, 2010

أنا وعدك

أنا وعدك


أنا الحر اللى
وعده دين
أنا وعدك
وأنا واعدك
أكون عاشقك
ليوم الدين
أكون ليكى
كما ضلك
وحبك ليا
يهديكى
ولا يضلك
وحبى ليكى
يكون هوا
اللى فاضل لك
وأكون حلمك
وتجسيده
وقلبك أكون
أنا عيده
أكون الحاضر
الأجمل
وأكون الجاى
بجديده
أكون الراحه
وأمانك
أكون من جوه
إنسانك
وكلمه حق
ف لسانك
أكون بسمه
على شفايفك
أكون نسمه
على خدودك
أكون غنوه
على عودك
أكون فى الدنيا
دى وجودك
أكون الضى
لعيونك
أكون فى الجد
انا عقلك
وأكون ف الحلم
أنا جنونك
أكون نجمه
تنور سكه
لو عتمه
ووقت الشده
والأزمه
أكون مددك
أكون سندك
ومهما تلفى
فى الدنيا
أكون بلدك
فعيشى فيا
وإتهنى
بقلبى عيشى
وإتمنى
بصوتى للحياه
غنى
وهاتى ايديكى
فى إيديا
حبيبتى قربى
منى
وإحكى للبشر
عنى
قولى لهم
أحلى ما فيا
بصحيح حاجتين
انا وعدك
وانا واعدك
أكون عاشقك
ليوم الدين

Monday, November 08, 2010

مبقتش حمل البعتره


أولا عن جد وحشتونى ووحشنى حتى انى انزل بوست بس فعلا مكانش فيه حاجه اكتبها ولا زال بس اهو بقى هاجى اصدعكم شويه وخلاص

ثانيا
كل سنه وانتى طيبه يا أموره كملتى عامك الرابع يوم 31 شهر اكتوبر الماضى ومجبتش ليكى تورته ولا عملت عيد ميلاد
مدونتى الحبيبه آسف على قله ذوقى لكن معلش لازم انتى تتحملينى انتى منى برضه

ثالثا
عيد سعيد عليكم مقدما لانى راحل يوم السبت القادم الى الاراضى الصحراويه وربى العالم هيكون فيه هناك نت ولا لأ هيكون فيه وقت ولا لأ هيكون فيه مزاج ولا لأ وكفايه لأ لأ لحد كده

رابعا
الى كل اخواتى المدونين أسف جدا انى مسألتش طول الفتره اللى فاتت بس مش هاقول اعذار بقى وكلام من كده بس بجد بتوحشونى ويارب تكونوا كلكم بخير وسعاده وعيد سعيد عليكم وعلى كل اللى بتحبوهم

خامسا
حته بقى ع الماشى طالما جيت اهو اى حاجه المهم انها اتكتبت وخلاص

------------------
مبقتش حمل البعتره



وماتدبحيش الامانى
لسه فى قلبى صغيره
-----------
لساها نور
بيشق سكه وسط هم
----------
وإلضمى عمرى سنين
حوالين رقبتك
---------
لسانى انفع اكون حبيب
لمينى لم
---------
الحب عمره
ما كان حساب
---------
ولا نص محفوظ
من كتاب
--------
ولا خط مرسوم
بالقلم والمسطره
-------
وبلاش حبيبتى
تبعترينى
--------
قلبى بيصرخ م الالم
مبقتش حمل البعتره

ملحوظه:-

قد لا أكون موهوبا لأكتب عنكى

ولكنى عاشق .....أكتب إليكى

Monday, July 12, 2010

لقاء رأس البر - يوم على جناح فراشه


من الصعب جدا ان تحظى بيوم غير اعتيادى فى حياتك الروتينيه الممله

لقاء راس البر هى ساعات مميزه وغير عاديه فى حياة معظم من حضروا اللقاء ابراهيم العدوى قد وصف اليوم بكل الكلمات الجميله وباسلوب اديب ماهر لذلك من الصعب مجاراته واعاده وصف اليوم الجميل

ساره رحيل سردت لحظات اللقاء لحظه بلحظه ناقله كل التفاصيل الصغيره وكأنها حملت كل من لم يأتى على كفيها معنا طوال الرحله

ليساندرا الرائعه تصر على ان يكون بوستها الاخير ولها ذلك بالتأكيد فهى صاحبه الفرح وأم العروس

لا أعرف ماذا أكتب تحديدا ولكن سأطلق عليكم دماغى وانتوا ونصيبكم بقى

اللقاء بالنسبه لى بدأ التفكير فيه من اول يوم اعلنت ليساندرا عن رغبتها فى تنظيم لقاء رأس البر

اللقاء منذ بدايته غير اعتيادى

اختيار المكان فكره جديده مدينه مصيف تختلف عن الاسكندريه فى كونها مصيف فقط واعتقد انها المره الاولى فى لقاءات المدونين

الميعاد تم النزاع على الميعاد لوقت طويل وصراحه انا الوم كل من قال انه سيأتى ولم يفعل وكل من تدخل فى تغيير الموعد ولم يوفى بوعده ولكن عزاء ليساندرا فى ذلك ان كل من لم يأتى خسر وقت مميز جدا



من الاسباب التى جعلت هذا اللقاء مختلفا
انه كان لقاء متجولا اكثر منه قعده وصراحه فانا علاقتى كانت قد قطعت مع رأس البر منذ اكثر من سبعه اعوام فلذلك كانت كانى ازورها للمره الاولى خصوصا بعد التغيرات الكبيره التى حدثت فى المدينه



سبب اخر قله العدد وان قد يراها البعض عيبا الا انها ميزه كبيره فى نفس الوقت فقله العدد تتيح لك التحدث والمناقشه مع كل المجموعه وتمنع الحلقات



معرفتى السابقه بكل الحاضريين لانى كنت سعيد الحظ واللقاء الاول الذى احضره لقاء المنصوره نوفمبر 2009 تعرفت على كل المجموعه فلم يكن هناك حاجز التعرف لاول مرة



كميه الضحك العجيبه اللى ضحكناها - ومحدش يقر علينا - كانت حاجه مميزه جدا فانا مضحكتش الضحك دا من زمان الحمد لله محصلش مفارقات عجيبه بس كان فيه جو مرح بمشاركه كل الموجودين



بالنسبه للناس



الفراشه الرقيقه ليساندرا

للمره التانيه باشوف ليساندرا يمكن اول مره اتكلمنا قليل جدا وقلنا ان شاء الله فى تجمع تانى نتكلم وقد كان الحمد لله

ليساندرا حد فنان جدا من جواه يعنى روحها حساسه جدا للجمال بتشوف الدنيا بعين جميله تلتقط ما لاتراه عيننا احنا العاديين

مرحه وعندها قابليه للتحمل سواء فى المشى - او الغلاسه - اصلى غلست عليها كتير بس تهريج طبعا والله يسامحهم اللى كانوا السبب

لها فكرها الخاص ووجهه نظرها الشخصيه فى كل شىء وتناقش وتحاور وطويله البال فى شرح ما تقصده تحديدا - ويمكن دى ملكه او موهبه او خبره مجال العمل جايز



ساره - رحيل

زى ما بحب اسميكى يا اختى العزيزه

ساره مش عارف اقول عنها ايه بس ساره دايما تحس انها اختك الافتراضيه

ساره بتسمع كويس يعنى عندها استعداد تسمعك وتديلك انتباها مهما كان الموضوع ممل صبوره يعنى

برضه عندها قوه تحمل للمشى ودى حاجه غريبه لانهن متعبوش بسهوله انا صراحه كنت باموت

اتناقشت مع ساره فى موضوع المشروع اللى بيشغلنى حاليا وسمعت منها وسمعت منى

كان ينقصنا حضور امجد القهوجى زوج ساره وامجد انسان جميل وحدوته تانيه ربنا يكرمه وييسر له الحال

ساره رفيقه درب التدوين سعدت جدا ان بحضورك



ضياء

ضياء للمره التانيه اشوفه بس المره الاولى اتكلمنا بس مش زى المره دى بجد كان نفسى جدا انى اشوفه تانى وفرحت اوى لما جه

ضياء شخص تحس طيبته من قبل ما تلمح طيفه يعنى وتحب جدا تتناقش معاه حتى لو هتختلفوا بس تحب تسمع طريقه تفكيره ووجهات نظره فى اى موضوع

ضياء من الناس اللى ممكن تهرج وهى شكلها جاد جدا بجمله بسيطه بس تموتك م الضحك

بجد شخص اعتز انى اتيحت لى الفرصه واتعرفت عليه واعتبره صديق كسبته من التدوين وصعب تلاقى حد زيه فى الزمن ده



ابراهيم العدوى

اخى الصغير فرق السن بينا مش صغير ومش كبير بس ابراهيم من الناس اللى قلبها ابيض ومن الناس اللى بتختصر المسافات بينك وبينها بسرعه فتشعر انك تعرفه من زمان

بيسمع لك كويس وبيهتم وبيسأل ابراهيم شايف انه موهبه هتكون لها مستقبل فى الصحافه والادب ان شاء الله

من الحاجات الجميله فى اليوم احساسى بفرحه ابراهيم اللى كانت ظاهره جدا



الى رفاق الرحله

ليساندرا

شكرا انك اتحتى لى الفرصه اشوف راس البر ودمياط بعينيك الجميله

يوم رائع لك الفضل فيه واقترح ان كل صيف يكون تجمع ليساندرا شىء اساسى



ساره

اختى العزيزه دعواتى لكى ولصاحبى امجد بالتوفيق وقريبا نفرح بيكم والتجمع الجاى تيجوا سوا ان شاء الله

ومش هانسى البطه بتاعتى وصيتك يا امجد واللى ياكل لوحده



ضيا

عارف المشوار كان صعب بس انت متعرفش قد ايه مجيك كان مؤثر جدا فى نفسى واحترامك للموعد ورغبتك فى انك تشوفنا دى بجد تقدير كبير منك وربنا يكرمك وييسر لك الخير ودمت صديقا



ابراهيم

شكلى هاشوفك كتير يا هيما سعدت بالرحله اللى بدأناها سوا من المنصوره حتى عدنا بسلام

اتمنى يا ابراهيم انك تستخدم طاقاتك فى العمل لموهبتك عشان اشوفك قريب محقق كل اللى تتمناه بمشيئه ربنا



------------

فيه كام لقطه ظريفه ومميزه فى اليوم

مكالمات التليفون

بدأت بمكالمه أمجد القهوجى

مكالمه اسعدتنى جدا جدا وشكرا يا امجد على ذوقك

داليا قوس قزح

داليا من الناس اللى باعزهم رغم ان ماتقبلناش غير مره واحده بس بجد باحترمها جدا وباعزها وكان نفسى تكون موجوده

شكرا جدا يا داليا

ايناس - بورسعيد

مكالمه ايناس فيها من الذوق ما يكفى بلد فايناس لم اقابلها من قبل ولا نعرف بعض تدوينيا ولكنها اصرت على ان تكلم كل الموجوديين شكرا ايناس على ذوقك وربنا يكرمك
--------------
أول مره فى حياتى أشوف سته يدخلوا مطعم يطلبوا نفس الساندويتش
الرحله لراس البر ودمياط رجعت لى ذكريات كتير منها ذكريات مع اصحابى ايام الجامعه ومنها ذكريات فى شغلى اللى كان قبل شغلى الحالى
وأول مره أعرف ان دمياط كرويه يا لساندرا
أول مره أحس انه تجمع بنكهه الرحلات

-----------
مره اخيره شكرا ليساندرا ولكل اللى مقدروش يجوا نأسف ونتمنى لكم حظ أفض المره القادمه وبجد لو سمعتوا اسم ليساندرا أو تجمع رأس البر متفكروش وفورا متضيعوش الفرصه هتعيشوا يوم مش هيتكرر

ملحوظه مهمه:

هوا انا مناخيرى حمره؟؟؟

Friday, July 09, 2010

ساعات باضحك


ساعات بأضحك

وأكمل ضحك

على روحى

فبتألم
---
تقوم روحى

تقول روحى

يا ضحكه راسمها

بالعافيه

لا هى صافيه

ولا دافيه

فروحى إمشى
---
ما أصل العيب

مهوش فيكى

أنا عارف

مكان العيب

مكان العيب

دا فى ملامحى

فعندك مثلا

الفرحه

فلو فرضا

انا فرحان
---
على وشى

ما تركبشى
---
بعكس الحزن

بيليق لى

ولو حتى

منيش حزنان
----
ونظره حزن

فى عيونى

طبيعيه

بشكل جنان
---
ولما حاولت

أتبسم

وأجرب بسمه

والتانيه

تعب وشى

من التجريب

ولكن برضه

ما لقيتشى
--
فقلت لنفسى

واتعجبت

صراحه ما أسهل

الاحزان

سالت نفسى

لما تعبت

ليه الحزن

بيليق لى

وليه الفرح

ما يليقشى
---
وليه الحزن

عمره طويل

وليه الفرح

عمره قصير

سنين الدنيا

تحمل فيه

ولو ولدت

ما بيعيشى
---
وانا صغير

قالوا لى زمان

بدون اسباب

ما تضحكشى
---
ماعرفوش ان

لما اكبر

وحتى لو لقيت

اسباب تضحكنى

ما هاضحكشى
---
لأن الضحك

راح ولى

فى سكه اللى

يروح فيها

يضيع ويتوه

ما يرجعشى
---
أنا اللى الحزن

أدبنى وربانى

وكان ليا

رفيق دربى

ومها زمانى

يوم دار بى

سنين عشره

أصيل والعشره

ما تهونشى
---
ساعات أضحك

وأغنى ومش بعيد

أرقص

تشوفنى الناس

تقول فرحان

بيتنطط

دا قام يرقص

ما هو الجاهل

ما يعرفشى
---
ولا فاهم ولا فاكر

كما قال

من زمان شاعر

انا بارقص

كطير مدبوح

يفرفر وحده

وسط سكوت

وبيسلم

خلاص الروح

دى مش رقصه

حياه لأه

دى رقصه

موت
---
فعذر لم أعد أضحك

يا اخوانا ومعلشى
---
منيش هاضحك

ولا راسم لا بالعافيه

ولا غيرها على وشى
---
يا إما الضحك

يدخل لى من الابواب

يا اما هاقفل الشباك

واقوله خلاص

ما يلزمشى

Saturday, July 03, 2010

Bloggers Blood Bank - الانتقال



ابتداء من اليوم هيتم الانتقال بالمشاركه والمناقشه على المدونه الرئيسيه للمشروع

أعاود بالتذكير بالايميل الخاص بالمشروع


رجاء من كل اخواتى اللى نشر لينك عنده او هينشر ياريت يكون بلينك مدونه البنك وليس مدونتى الشخصيه

أشوفكم هناك

Bloggers Blood Bank (3rd post)

Bloggers Blood Bank (3rd Post)



بادىء ذى بدء أدين بالاعتذار لاستاذتى العزيزه دكتور ستيته لانى أصابنى الاحباط فى مرحله ما وأشكر لها تعليقها الذى أمدنى بالحماسه ثانيه والاصرار على تكمله المشروع مهما طال الوقت ومهما كان العدد قليل
ثانيا أود أن أشكر من تفاعلوا بجديه مع المشروع وترتيبهم من حيث الأسبقيه فى إريال بيانتهم و إبدائهم الرغبه فى المشاركه فى المشروع
دكتوره ستيته
فتاه من الصعيد
يوم جديد
منونه - واحد شاى
يبدو ان الرجاله ماتوا فى الحرب فعليا
--------------------------------
خلصنا المقدمه نتكلم شويه بقى
أسعدنى الحظ وحضرت التبرع الخيخى الأخير يوم السبت اللى فات وأسعدنى الحظ وقابلت مجموعه ظريفه جدا أعرف منهم أربعه شرفونا فى لقاء المنصوره شهر نوفمبر اللى فات وهم
خيخه - فاتيما - خالد همس الاحباب - محمد عسقول
صراحه كانت فرصه كويسه انى اتعرف على خيخه وفاتيما لان للاسف فى لقاء المنصوره لم تتح لى الفرصه انى اتكلم معاهم وفرحت جدا انى قدرت اتعرف عليهم واتكلم معاهم وبجد مش قادر اقول غير انى مبسوط اوى ان فى بلدنا شباب بالعقليات والهمه والاراده دى
باقى باشوفهم لاول مره
وليد وكمال ومصطفى وبشمهندس احمد كلهم ناس محترمه اوى وظراف جدا واتشرفت بمعرفتهم وان شاء الله نتقابل دايما
نيجى لاخيرا وليس اخرا
منونه درويش
كانت مفاجأه ليا انى الاقيها هناك وسعدت جدا بلقائها لانها يمكن هى وفاتيما اللى كان عندهم فكره عن المشروع كمان منونه حضرت توقيع كتاب ساره فى طنطا لكن لم اتعرف عليها للاسف
خلصنا من تفاصيل التبرع نيجى لنقطه مهمه
حضورى للتبرع دا جه فى وقته جدا لانى صراحه كنت محبط من عدم نجاح الفكره او انى كنت منتظر رد فعل قوى بس التبرع دا غير وجهه نظرى بشكل كبير احنا عددنا مكانش كبير صحيح بس الاستمراريه هى الاهم خيخه نجحت بفضل ربنا انها تخلى الحمله دى مستمر من 2008 حتى الان وان شاء الله دايما ودا المهم فى الموضوع
----------------------------------------
مش عارف اقول ايه عشان احمس الناس بس هاعيد نشر كومنت من جيجى والعالم على البوست اللى فات


جزاكم الله خيرا كثيييييرا حقيقى قطره دم تساوى حياه




امبارح شفت واحده عماله تزعق ومنهاره وتنادى فى كل مكان عايزه فصيله دم بي موجب لان اخوها محتاج تلات اكياس وهو بيعمل عمليه وقتها
احنا كنا رايحين مشوار فى مستشفى جنبها

خلصنا المشوار نزلنا لانها قاعده ادام المشرحه واخوها مات بعدها بحوالى ساعتين


ياريت بجد نساعد فى موضوع الدم ده ويامنا من كربات الزمن

جيجي والعالم

---------------------------
لهنا انتهى تعليق جيجى وبالنسبه لى لا تعليق

تعليق تانى من المدونه داليا وهى صحفيه

فكره كويسه بس عايزه شغل جامد جدا
ممكن اساعدكم بنشر الفكرة عندنا في جرنال الشروق بس انا محتاجه معلومات أكثر عن الحملة وكم واحد انضم ليها وما مستوى تنفبذها
يا ريت تبعلتي تفاصيل اكثر

مع احترامي
داليا
---------------------------
طبعا مش عارف هل شايفيين ان الحمله ممكن تقوم بأربعه؟
أعتقد لو كنت عملت بيج على الفيس بووك وجايز لو سميتها
بس يا سيدى وقامت متبرعه
يمكن كان انضم لها حتى لو خمسين واحد فى تلت ايام بلاش خمسين الف
--------------------------
أخيرا
محتاج مساعده اصدقائى المدونيين لتفعيل الفكره
نداء
خيخه
محتاجك معايا فى المشروع دا واعتقد ان فهمتك الفكره بايجاز اقرى التفاصيل بس بجد محتاج ارادتك وحماسك وزى ما انتى بتقولى على نفسك انك بتاعت تنفيذ محتاج لنشاطك وتصميمك دا معانا فى الفكره دى
--------------
خالد همس الاحباب
اخويا الكبير محتاج همساتك فى المشروع دا وانا عارف انك مش بتتأخر فى الخير
--------------
فاتيما
محتاج اعلان عندك يا فندم عشان ال 300 مدونه اللى فى السايد بار يعرفوا
-------------
ندى الياسمين
محتاج مجهودك يا صبرنى وانا عارف تواجدك فى التدوين وعارف انك بتحبى الخير
------------
ساره رحيل
وعد الحر دين عليه يا ساره
مستنى مشاركتك زى مشاركاتك بتاعت زمان
قولتى هتعلنى ومش اعلنتى
-----------
اخيرا بس بجد المره دى
مش هاتكلم عن اهميه التبرع ولا انقاذ حياه
لكن هاقول مش صعب يوم كل كام شهر تتبرع فيه بكيس دم
واعتبره ابتسامه فى وجه اخوك المريض
وعلى رأى فاتيما الواحد لما يبص فى استماره التبرع ويجيب ب لالالالا يعرف قد ايه ربنا انعم عليه وقد ايه ربنا معافيه من حاجات كتير
ربنا يديكوا الصحه ويمتعكم بيها وبعمركم
وجازاكم الله كل خير

Sunday, June 27, 2010

Bloggers Blood Bank (2nd post)




اخواتى المدونيين والمدونات ازيكم



قاربت ان انهى السنه الرابعه فى عالم التدوين اينعم انا عشت فى الجانب الظليل من هذا العالم اى ان مشاركاتى الفعليه كانت محدوده وعدد اللى يعرفونى بسيط لكن العالم دا اثر فيا تاثير قوى جدا اتعلمت من ناس حاجات كتير كويسه واتعلمت من ناس برضه ايه شكل الحاجات اللى مش كويسه المهم مش عارف باقول الكلام دا ليه بس يمكن البوست اللى نزلته دكتور ستيته ومسارعه اخواتى المدونيين لتأييد الفكره لمس مشاعرى بشكل كبير



هاقولكم على مفاجأه فكره البنك دا فى ذهنى من اكثر من 3 سنوات وظلت حبيسه داخل رأسى اللى ازدحم بحاجات كتير اهمها اكل العيش والبكا على العمر اللى بيعدى على الفاضى



من 10 سنين تقريبا اخدنى واحد صاحبى فرع جمعيه رساله فى القاهره وتحمسنا اوى للفكره كنا لسه شباب فى جامعه وقلنا عاوزيين نعمل فى المنصوره فرع واحنا عندنا الوقت والمجهود وبالفعل انتدبنا شباب من فرع القاهره وبدأنا نبحث عن عدد من الشباب واجتمعنا ورتبنا وسمعنا منهم وكنا فى غايه السعاده لكن بعد ما مشيوا طلع علينا مجموعه من الناس اللى معانا المتشددين شويتين بان دى جماعه ماسونيه وانا مكنتش اعرف يعنى ايه ماسونيه وان تمويلها مشبوه وانها بتدعو الى الاختلاط والخ الخ



وبعد ما فتحنا بقنا لاقينا نفسنا مجبريين اننا نستسلم للأمر الواقع وقرروا انهم يمارسوا نشاط خيرى فردى وكان اعتراضنا انه هيموت بتفرق المجموعه دى وقد كان فعلا بعد سنه اللى سافر واللى اتجوز واللى ربى دقنه وبخخخخخخخخخخ

وبعدها بخمس سنين اتعمل فرع رساله فى المنصوره وبعدها فى كام مركز فى المحافظه لكن للاسف تأخرت الفكره خمس سنين ولم نشارك فيها

معلش انا هارغى شويه بس لان دى فرصه نادره انا فى العاده باقول كلمتين سجع ودمتم وبدل جاتنى الفرصه ارغى بقى



مش حابب اللى حكيت لكم عنه فوق عن رساله يحصل للفكره دى فعشان كده بالله عليكم اللى مش عجباه ميكسرش مجاديفنا المشروع كله عشانا كلنا ولوجه الله سبحانه وتعالى وعشان يبقى التدوين جمعنا على فعل خير ومساعده انسان مريض فلربما نثاب عليه



اولا هاطرح عليكم شويه افكار







1- عاوزيين نشر للموضوع بشكل كبير جدا محتاجيين كل مدون يعرف الموضوع دا لاننا هنكون محتاجيين عدد كبير او معظم المدونيين الموجوديين داخل مصر



2- عاوزيين نكون لجنه اشراف على البنك هتكون عباره عن فرديين من كل محافظه من محافظات مصر يتوفر فيهم بعض الشروط



اولا : ان يكون عضو لجنه الاشراف مستخدم يومى للانترنت ويفضل من يكون يستخدم الانترنت فى عمله حتى تتاح له فرصه الاطلاع على المدونه يوميا او ان لم يكن فيوم ويوم بالتبادل مع زميله الاخر من نفس المحافظه



ثانيا: ان يكون على استعداد اعطائنا رقم هاتفه ويكون من الاشخاص السهل الوصول اليهم عن طريق الهاتف "مش زيي يعنى" لان قد نحتاج الوصول اليه فى اى وقت



3-الموضوع مش محتاج اى ماديات وبالنسبه للموقع هنبدأ بمدونه انا قمت بانشائها فعليا وايميل قمت برضه بانشاءه فعليا وفى المستقبل ان شاء الله انا متكفل بعمل موقع الكترونى للبنك يكون بشكل اكثر احترافيه



4- محتاجيين لجنه الاشراف تكون شباب وشابات وده له اسبابه



5- انا مش هاقدر اكون متابع ولا مشرف بحكم ظروف شغلى بس انا متبرع ان شاء الله بسته اشهر تفرغ تام للمشروع ده بواقع شهر وشهر ولكنى الوقت اللى هاكون فيه متواجد فى اجازه مستعد للسفر كل انحاء الجمهوريه لو حتى السلوم لتنظيم حملات التبرع فى المحافظات بشكل دورى مش عاوزينها تقتصر على القاهره فقط الحمد لله صبرنى يارب عملتها مره فى المنصوره لكنها لم تتكرر لانه كان مجهود فردى منها ربنا يعزها



6- اللى شايف انه يقدر يكون مشرف عن محافظته هيبعت يقولنا عن تطوعه دا واللى مش هيقدر بس عاوز يكون متبرع دائم معانا سواء فى التبرعات الدوريه بتاعت محافظته او فى قاعده بياناتنا لو احتجنا له فى طوارىء هيبعت برضه يحدد الكلام دا



7-بالنسبه للتليفونات والايميلات والمعلومات الشخصيه ان شاء الله هتكون سريه جدا اللى فى ايدى حاليا ان انا اللى استقبلها على الايميل المخصص للمشروع دا لو حد عنده اعتراض على شخصى يتفضل يرشح حد تانى وانا معنديش ادنى مشكله



8-الحمله دى يا جماعه اهميتها اكبر من اهميه اى تجمع او تبرع لانها ان شاء الله هتكون خطوه لبدايه مشروع يوفر دم للمحتاجيين فى كل انحاء مصر ويمكن يستمر بعدى وبعدكم بسنيين عشان كده عاوزيين نعلن عنه بشكل كويس



9- المدونه التى انشأت كنواه لبنك دم المدونيين هى



http://www.bloggersbloodbank.blogspot.com/



الايميل اللى ان شاء الله هنستقبل عليه بياناتكم هو



ourbbb@yahoo.com



ياريت اللى هيبعت ايميل يكون بالشكل الاتى



الاسم:



فصيله الدم:



رقم الهاتف:



الايميل:



المدونه:



المحافظه:



المشاركه: ( مشرف ام متبرع )0



حاجه اخيره يا جماعه انا فصيلتى بيقال انها نادره وباتخيل لو احتجت مره نقل دم هيكون وضعى ايه؟ الناس اللى حواليا هيكون شعهورهم ايه؟ لو جالهم واحد من اخر الدنيا يديهم دمه يجرى فى عروق اخوهم ولا ابوهم ولا اختهم تتخيل لو مكانهم يبقى شعورك ايه هتحس انه ملاك؟ ان ربنا بعته لكم من السما؟ هتحس ان ربنا كتب للمريض النجاه والسبب كان المتبرع ده؟ اكيد هتحس بكل دا مين فينا ميحبش يبقى سبب ربنا لشفاء انسان مين فينا ميحبش يبقى وسيله فى ايد ربنا لانقاذ حياه







منتظر مشاركتكم منتظر حد يقولى انا معاك



ملحوظه:

لفت انتباهى الاخ العزيز شارم لنقطه مهمه

يا جماعه اقروا الكلام بتركيز عشان تفهموا الفكره

لا ان ولا الدكتوره ستيته قلنا ان البنك ده هيكون للمدونيين منهم فيهم بس بالعكس يا جماعه اللى هيستفيد من الدم ده كل حد واى حد وعلى حد قول شارم المسلم او اليهودى والمدون والغير مدون

لكن المقصود مين المتبرعيين؟ مين اللى اقدر اوصل لهم دلوقتى؟ مين اللى فى ايدى وقدام عينى ليل نهار؟

انتم ايوه انتم المدونيين لانى مقدرش انزل الم الناس من الشارع واخد اسماؤهم واعمل لهم قاعده بيانات واذا كان الاسم اتفهم غلط هاشرحه صح

بنك دم المدونيين يعنى بياخد الدم من المدونيين لاى محتاج مش معناه انه لمساعده المدونيين لما يحتاجوا بالعكس احنا هنعمل تبرع دورى فى كل محافظه من ابنائها اما معنى كلمه لما حد يحتاج يعنى لو فيه ظرف طارىء زى اللى حصل لاختنا عاشقه النقاب مع والدتها شافاها الله وعافاه وبارك لهم فى صحتها وعمرها
بالنسبه من المقصود بكلمه بيانات سريه فده معناه ارقام الموبايلات والايميلات لان محدش فينا يحب ان اخته يكون رقمها معروف على صفحه مدونه لان لو انا وانت عندنا اخوات بنات ونفوسنا سليمه فيه ناس كتير تافهه ونفوسها مش سليمه ومينفعش نعاقب حد حابب يعمل خير بانه يتعرض لسخافات اما بالنسبه للفصائل فدى ممكن تكون متاحه من غير اسماء يعنى نقدر نقول ان عندنا 3 اشخاص بى سالب فى الاسكندريه مثلا

رجاء اخير يا جماعه انا والله مش عاوز من ورا الفكره دى اى شىء واللى يحب ينفذها حتى لو بعيد عنى يتفضل فى الاول والاخر هى فكره خطرت على بالى وانا حسيتها كويسه اللى يحب يشارك ياريت يشجعنا ويساعد واللى مش حابب ياريت ما يحاولش يؤثر علينا بالسلب
والله المستعان

BBB




أولا


عدنا والعود أحمد لازم تقولوا لى حمد لله على السلامه لانى رجعت من يومين واحشنى جدا كل المدونيين ومدوناتهم ولكنى مقصر شويتين لاسباب كتيره مش هادوشكم بيها


ثانيا


لفت انتباهى حاجتيين


اولهم موضوع مشكله عاشقه النقاب ووالدتها شفاها الله وعافاها وبارك لهم فى صحتها وعمرها يارب ويطمنوا عليها


ثانيهم


حملات التبرع بالدم المستمره وربنا يبارك للقائميين عليها ويجازيهم خير


المهم عشان منتوهش من بعض مره من كام سنه شفت على النت حاجه زى موقع لبنك دم او حاجه زى كده مش فاكر تحديدا
بتقوم بالتسجيل عليه وبتسيب رقم تليفونك وفصيله دمك ولما حد بيحتاج بيبعتوا لك ايميل برقم تليفون الحاله ودا حصل معايا كانت حاله بنت صغيره فى مستشفى فى مدينه نصر وكلمت والدها فعلا بس قالى انهم لقوا وحاليا مش محتاجيين


المهم بعد كده راح منى الموقع ومش فاكر حاجه عنه حاليا


بس فى دماغى فكره ممكن تكون كويسه وممكن تشوفوا انها مكرره او لها عيوب وعموما لو عجبتكم نتناقش فيها


الفكره هى


BBB


Bloggers Blood Bank


نعمل مدونه او لو حد فينا ليه فى برمجه المواقع نعمل موقع خاص بينا مش مشكله


المدونه دى او الموقع دا هيبقى له دوريين مهمين


الدور الاول


ان نعمل قاعده بيانات بفصائل دم الراغبيين مننا والمواظبيين على التبرع وارقام تليفوناتهم وطبعا هتكون بياناتهم سريه


ودا طبعا ممكن يسهل فى حاله لا قدر الله ان حد مننا المدونيين يحتاج دم لاى حد ببساطه هيقدر يدخل المدونه او يبعت ميل بفصيله الدم وتليفونه والمشرف يتولى ترتيب التواصل بينه وبين اللى هيتبرع


الدور التانى


يكون للمدونه الاشراف على جميع حملات التبرع فى جميع محافظات مصر


يعنى زى ما فيه تبرع ثابت فى القاهره نحاول يكون على مدار السنه فى تبرعات ثابته فى كل محافظه ونختار عضويين من كل محافظه فى المجموعه اللى هتشرف على المدونه دى


انا عارف ان يمكن العدد مش كبير لكن ايه يمنع اننا نحلم ان فى يوم يبقى عندنا تبرع كل شهر فى محافظه مختلفه ويكون عد المتبرعيين كبير


فكره التبرع اعتقد بدأت صغيره وانا شايفها بتكبر ودى حاجه فعلا محسسانى بفرحه واتمنى تتعمم فى كل مكان


باب المناقشه مفتوح


وياريت اللى يوصل للبوست ويعجبه يقوم هوا بنشر الفكره وجمع الاراء لان مجال التدوين بقى كبير وانا مش متواجد بصوره فعاله


ملحوظه


على فكره يا جماعه انا اتكلمت مع شباب واكتشفت ان فيه ناس عمرها فى حياتها ما اتبرعت


الشباب فيه خير كتير بس احيانا بنحتاج حد يعرفنا الطريق

Thursday, June 24, 2010

حداد على خالد سعيد


إهدا إلى


روح الشهيد


خالد سعيد


تعرف يا خالد


إنى ما كنتش


اعرفك


بس اكيد


دلوقتى نعرف


بعض جدا


أيوه أكيد


ما أنا اسمى


غيرته وبقيت


خالد سعيد


******


أنا شاب


مصرى


بكى عليك


وطلع مظاهره


ووقفه صامته


وحلف ما يسكت


الا لما يجيب


حقك إليك


وبرضه ليا


ما أن وانت واحد


خالد سعيد


******


تعرف يا خالد


ان لسه


مفيش جديد


الظلم لسه


هوا هوا


كاتم على


نفس البلد


وماسكها


بالنار والحديد


******


بس الجديد


إن روحك البريئه


فوقتنا ع الحقيقه


فهمتنا انه لازم


نبقى واحد


نبقى ايد


واحده واقفه
فى وش


أى ظلم
مهما كان
طاغى وشديد


******


خالد انا


حاسس وعارف


انك اكيد


بتحس بينا


وسامع وشايف


عاوز اقولك


ان زمان


كنت باخاف


دلوقتى أنا


مبقتش خايف


********


وانا باوعدك


والوعد دين


ما هانام ولا


تغفل لى عين


الا لما الحق


يرجع


لما شمس العدل


تطلع


لما كل الدنيا


تسمع


ضحكتك جايه


من بعيد




إمضاء


خالد سعيد

ساعات باضحك

ساعات باضحك





ساعات بأضحك

وأكمل ضحك

على روحى

فبتألم

تقوم روحى

تقول روحى

يا بسمه راسمها

بالعافيه

لا هى صافيه

ولا دافيه

فروحى إمشى

ما أصل العيب

مهوش فيكى

أنا عارف

مكان العيب

مكان العيب

دا فى ملامحى

فعندك مثلا

الفرحه

فلو فرضا

انا فرحان

على وشى

ما تركبشى

بعكس الحزن

بيليق لى

ولو حتى

منيش حزنان

ونظره حزن

فى عيونى

طبيعيه

بشكل جنان

ولما حاولت

أتبسم

وأجرب بسمه

والتانيه

تعب وشى

من التجريب

ولكن برضه

ما لقيتشى

فقلت لنفسى

واتعجبت

صراحه ما أسهل

الاحزان

سالت نفسى

لما تعبت

ليه الحزن

بيليق لى

وليه الفرح

ما يليقشى

وليه الحزن

عمره طويل

وليه الفرح

عمره قصير

سنين الدنيا

تحمل فيه

ولو ولدت

ما بيعيشى

وانا صغير

قالوا لى زمان

بدون اسباب

ما تضحكشى

ماعرفوش ان

لما اكبر

وحتى لو لقيت

اسباب تضحكنى

ما هاضحكشى

لأن الضحك

راح ولى

فى سكه اللى

يروح فيها

يضيع ويتوه

ما يرجعشى

أنا اللى الحزن

أدبنى وربانى

وكان ليا

رفيق دربى

ومها زمانى

يوم دار بى

سنين عشره

أصيل والعشره

ما تهونشى

ساعات أضحك

وأغنى ومش بعيد

أرقص

تشوفنى الناس

تقول فرحان

بيتنطط

دا قام يرقص

ما هو الجاهل

ما يعرفشى

ولا فاهم ولا فاكر

كما قال

من زمان شاعر

انا بارقص

كطير مدبوح

يفرفر وحده

وسط سكوت

وبيسلم

خلاص الروح

دى مش رقصه

حياه لأه

دى رقصه

موت

فعذر لم أعد أضحك

يا اخوانا ومعلشى

منيش هاضحك

ولا راسم لا بالعافيه

ولا غيرها على وشى

يا إما الضحك

يدخل لى من الابواب

يا اما هاقفل الشباك

واقوله خلاص

ما يلزمشى

Thursday, June 10, 2010

مكتوف اليدين

مالك يا مصر؟ فيكى ايه؟ مكنتيش وحشه اوى كده؟
لم ابكى عندما رأيت الصوره أمس لكننى نمت بصعوبه واستيقظت هذا الصباح لابكى بكاءا شديدا على خالد رحمه الله
ان كان مات خالد فالى جنه الخلد ان شاء الله لكن موت خالد عذب نفسى واوجعها ضربا وسحلها سحلا وبقيت حيه تتنفس وتصرخ من شده الالم
اللهم اغفر له وارحمه وارحمنا يا الله فلقد ضاقت بنا الدنيا بما رحبت

يا مكتوف اليدين

إمتى بقى هتثور؟

يا عايش فى الظلام

مش واحشك

تشوف النور؟

ومش مخنوق

من الحبسه

ورا ميت سور؟

يا لازم مكانك

بكره يجيك الدور

يا مستنى

و ماسك لسانك

كما المسحور

لاهو بيصرخ

ولا يغنى

و سادد ودانك

بعلو الصوت

اناديلك

ما تسمعنى

لو كنت حى

قوم اقف

على رجليك

ولو ميت

لا دعوه برحمه

هتصحيك

ولا الذل

اللى شاربينه

يأثر فيك

وسيب الجرح

يوجعنى

وملعون أنا وإنت

ودنيتنا

وسيبنى منى

أنا ليها

أسب لها

وتلعنى

Wednesday, June 02, 2010

يا ست الكل

قرأت منذ حوالى شهر رساله لقارىء على صفحات جريده المصرى اليوم يروى فيها انه من سكان القاهره و انه يمتلك قطعه ارض فى محافظه دمياط وذهب لمعاينه الارض وبجوارها غرفه بها محولات كهرباء او شىء من هذا القبيل ودخلها لغرض ما فوجد بها ملابس وبعض اوانى الطعام مما يدل على ان احدا يسكن بها ولكن لم يجد احد وعندما امعن النظر وجد هيكلا عظميا ممدا على سرير وعندما سأل أهل المنطقه قالوا انهم كانوا يشتمون رائحه تحلل منذ بضعه شهور لكنهم ظنوا انها جثه قطه او كلب
الى هنا تنتهى القصه وتزامنا مع جثث المصريين الاتيه فى نعوش طائره من كل أنحاء العالم كتبت هذا البوست
يا ست الكل
يا ست الكل
يا سقيانى المرار والذل
أنا شفت العذاب ألوان
يا ست الكل
وأنا فى حضنك
ومتشعلق فى جلابيتك
منيش حاسس بأى أمان
يا ست الكل
أنا باتهان
فى كل مكان
من الدنيا
على فكره
أنا مطعون فى ألمانيا
وجثه راجعه م السودان
ومدبوح هنا فى ليبيا
وأشلاء جايه م اليونان
وقاتلينى فى نيجيريا
وجلدينى فى أرض نبينا
ومصلوب حتى فى لبنان
يا ست الكل مش سامعه؟؟؟
ما كل الكون أهو سامع!!!؟
يا ست الكل أنا إبنك
ومش لاقيانى فى الشارع!!!؟
يا ست الكل أنا كفنى
صبح أحلام وأمنيه
ومتريين أرض لجل الدفن
على أرضك رفاهيه
يا ست الكل
ملحوظه
أنا إنسان

Monday, May 17, 2010

متى ينتهى هذا الغباء؟


لم تكن لدى النيه للكتابه حول هذه القضيه مجددا. لا أعلم لماذا ربما السبب هو شعور اليأس الذى يتملكنى أحيانا ولكن دعونا نتحدث فى بضعه نقاط بسيطه بتفكيرى المحدود تلبيه لدعوه اختى العزيزه خواطر شابه بناءا عن حمله للعزيزه دكتوره ستيته شاكرا لهما مجهودهما ولكل من كتب فى هذه القضيه

سأتحدث بوجه عام عن الصراع العربى الاسرائيلى والقضيه الفلسطينيه وليس عن قضيه الأسرى لانها جزء من كل


القضيه الفلسطنيه - - - متى ينتهى هذا الغباء؟


أرى القضيه الفلسطينيه كانسان قتلناه بايدينا ولكننا نسينا أن نقوم بدفنه واستبقينا جثته حتى تححلت وأصبحت هيكلا عظميا استخدمناه كمنضده نأكل ونشرب عليها ويتملكنا الأسى بعض الأحيان حينما نتذكر أن هذه هى الجمجمه أو تلك كانت اليد


تلك القضيه الميته حلها من أسهل ما يكون. فلطالما سألت نفسى ما هو حل تلك القضيه؟ ماذا ينقصنا لمواجهه إسرائيل؟ ماهى أمكانياتنا الحقيقيه؟ وهل نستطيع مواجهتهم؟ هل نستطيع الإنتصار عليهم؟


دعونا قبل الاجابه على تلك الأسئله نذكر أنفسنا بمبدأ حياتى بسيط وهو أن من يعمل من أجل عقيده وإن كانت فاسده لابد أن يحالفه النجاح ويحقق نتائج فى الحياه الدنيا ولست محتاج الى ان أذكر أننا لا نعمل من أجل عقيدتنا أو أن اليهود يعملوا من أجل عقيدتهم


فمن الواضح تماما أن نسبه كبيره أصبحت إما مسلموا بطاقه أو مختزلى الدين فى الشكل والعبادات والنوعيين لا لا يجب أن ننتظر منهم اعلاء الآمه أو تغيير الواقع المهين لآنهم مغيبيين


نعود للاجابه على السؤال الأهم


ماذا ينقصنا لمواجهه اسرائيل والانتصار عليها؟


لا ينقصنا المال لانه معلوم لدينا جميعا أن بعض الدول العربيه من أغنى دول العالم أو ان ثروات العرب مجتمعه تمثل جزء كبير جدا من ثروات العالم


العدد لا ينقصنا العدد بالطبع فعدد العرب فقط وليس المسلميين عدد كبير مقارنه بالاسرائليين


اذا ماذا ينقصنها؟


ينقصنا أن نتحد كعرب, أن ننسى خلفاتنا ومعايرتنا لبعضنا البعض ,ان نوحد الصف, لن تحل تلك القضيه بدون الاتحاد ولن ننتصر فى مواجهتم بدون وحده الصف


ثانيا


نحتاج الى رجال يؤمنون بالقضيه


معذره اخوانى نحتاج الى رجال وليس الى ذكور فقد تجد طفله فلسطينيه او شابه لكنها اشجع من الف شاب فى دولنا


اذا فمفهوم الرجوله يختلف عن النوع


نريد رجالا رجالا رجالا


يؤمنون بالقضيه والايمان بالقضيه نقطه اساسيه لانه يجب ان يكون نابع من القلب انت تحمل تلك القضيه على عاتقك ان تكون هى اهمقضيه فى حياتك

اذا تلخيصا لكل ما كتبته بعدم تركيز سابقا

حل القضيه يتمثل فى الاتى

وحده العرب - - - صنع رجال - - - الايمان بالقضيه

والا فادعوا الله ان يعجل من اجلكم كى لا تروا ما هو قادم
ملحوظه

لا تنتظروا صلاح الدين فلن يعود من قبره ولكن فلنصنع صلاح دين اخر من زمننا

ارجو الا نعلق حل القضيه على حكامنا فلن يتغيروا الان بعد كل ما مر علينا من ذل ومهانه . ضعوا القضيه فى قلوبكم ارضعوها الى اطفالكم فان اصبحنا رجالا سيخرج يوما من بيننا رجلا يحمل الرايه ويقود الامه الى القدس مجددا


هذا لينك بوست كتبته بعد انتهاء حرب غزه لاذكر ان القضيه لا يجب ان تنتهى بنهايه الحرب ارجو الاطلاع عليه



لن استطيع تمرير الدعوه الى عشره مدونيين لاننى للاسف غير متابع

Tuesday, May 11, 2010

أجمل فازه

مقدمه لابد منها


أهدى هذا البوست الى الفنان الشاعر الصديق أمجد القهوجى الذى تعرفت اليه مؤخرا وأمجد من البشر القلائل الذين تشعر من الوهله الأولى أنهم يدخلون قلبك بلا استئذان ويشعرك أنه مهتم لسماعك ويعطيك من وقته ويستمع باهتمام رغم قصر معرفتك به

تشعر وكأنك تعرفه من سنين طويله رغم أنك تتحدث معه للمره الأولى


شكر خاص


ل أمجد القهوجى من ألهمنى فكره البوست أو تحديدا غششنى أول جزء فيها بالنص وساعتها قلت له هاكتبها باهديها له واتمنى انها تعجبه


شكر خاص للأخت ساره رحيل فساره مازالت وستزال المدونه المخلصه للتدوين والمدونين - معلش يا ساره كنتى جمهورى الأوحد على مدار سنوات ومتحمله كثير من جرعات الكآبه


شكر خاص لأمى العزيزه عطش الصبار فهى دائمه السؤال عنى حينما أغيب - ربنا يديكى الصحه والعافيه يا ماما


شكر خاص ل صبرنى يارب فصبرنى لا تمل ان تكون صوت الضمير اليقظ طوال الوقت - مرآه عيوبك الصريحه - دش الميه الساقعه فى عز البرد


شكر خاص الى كل من زارنى يوما فى مدونتى العزيزه الى كل من قرأنى الى كل من فهمنى الى كل من استقطع دقيقه من وقته ليقرأ لى على مدار ثلاثه اعوام ونصف


الى كل من تركوا التدوين اصدقائى اشتقت اليكم فحين بدأت كنتم مصدر دفء ونور يضىء لخطواتى الاوليه فى هذا العالم


شكرا الى كل من اثنونى عن اعتزال التدوين عام 2007 وحيد - حدوته - محض روح - واحده من الناس


هذا البوست تفائلى الى كل من يشتكى كآبه البوست الماضى اهداء الى كل المتفائليين





أجمل فازه





أيوه كسرت


ومش خبيت


أجمل فازه


كانت فى البيت


أيوه باقولها


ومش راح أفكر


ف اللى اتكسر


ماشى بادور


فى الفتاريين


ماشى أتخيل


فازه جديده


أجمل من كل


التانيين


**********


وإن كان حلمك


يوم ضاع منك


طب إيه يعنى


لملم نفسك


صحصح غيره


من أحلامك


النايميين


**********


وإن كان حد


سبب أوجاعك


أو برخيص الدنيا


دى باعك


طول ما القوه


مصاحبه دراعك


إياك تسند


ع الخاينيين


**********


أصل العمر


ما فيهشى مغالطه


ولا يتحمل مننا غلطه


أما القلب


كفايه عليه


عاش فى الحزن


سنيين وسنيين


**********


طول ما هو باقى


فى عمرك ثانيه


حاول فيها


تعيش الدنيا


خلى سعادتك


صنع إيديك


وبلاش تسمع


لللايميين*


**********


* لللايميين :لام - يلوم - لائم - لايم - لائميين - لايمين




أستودعكم الله الذى لا تضيع ودائعه وأرجوكم لا تنسونى من صالح دعائكم

Saturday, May 01, 2010

مش عازف

مقدمه لابد منها
على غير العاده بوست تفائلى على الرغم من انه يختلف تماما عن حالتى المزاجيه الآن ولكنى كتبته منذ أكثر من شهر

أعجبتنى حمله 30 يوم تدوين ومشاركه منى قد اكتب بعض البوستات ولكن ليس يوميا لان الناس اللى زيي كويس جدا لو كتبه اربع خمس بوستات فى شهر دا يبقى انجاز ويكون برضه كسرت القاعده وعدت للتدوين بشكل كبير

تحياتى لكل المشاركيين فى الحمله وبجد فكره رائعه لتعيد التدوين الى مكانه الطبيعى بالتوفيق للجميع







رميت الناى ومش عازف

لأنى خلاص منيش عارف

إذا كان حد بسمعنى
**********
خلاص قلمى أنا كسرته

وورقى كله بعترته

لأن عمرى ضيعته

بأدور على ضاع منى
**********
رميت ألوانى واللوحه

حياتى يا رسمه ممسوحه

زهقت أمشى على بقايا

نقوش محفوره جوايا

خلاص الصبر أنا بعته

وشارى مكانه ضحكايه
**********
وأقولك يلا خاصمينى

ولو بجميله تنسينى

ولا بينك ولا بينى

وهاعمل نفسى أنا ميت

وكأنك ما شوفتينى
**********
وأرمى من على كتافى

هموم أزليه حنيانى

ولو فكرتى تتعافى

عليا يا دنيا من تانى

هاقولك لأ كده كفايه

وأقولك درس مجانى

يا دنيا إنتى مش دايمه

وانا إنسانك الفانى

Monday, February 15, 2010

يا أما ليه؟؟

يا أما ليه؟؟
يا أما ليه شايفه وساكته؟
يا ام قلب أبيض وطاهر
ليه نهار الحق ولى؟
خلى ليل الظلم ظاهر
راح زمان الخيروعدى؟
جه زمان مليان مظاهر
**************
يا أما ليه االتوهه ديا؟
ليه مبترديش عليا!!!
يا أما خايف حبل شوقنا
يوم يضيع من بين إيديا
**************
يا أما صوتى راح خلاص
وإنتى قافله ليه ودانك؟؟
يا أما نبح الكلب فيكى
سامعه أوضح من أدانك!!!
**************
يا أما ليه واخده فى حضنك
بس دايما الكلاب؟
يا أما ليه سقيانى مرك
والشقى وألوان عذاب؟
يا أما تايهه منى صورتك
مش شايفها فى الضباب!!!
يا أما ليه أحلامى فيكى
مستحيله وم الصعاب؟
يا أما ليه بستان أمانك
مش بيطرح طرحه غاب؟
**************
يا أما مش باين هلالك!!!
يا أما ليه مكسور صليبك؟
يا أما ليه مش شاغله بالك!!!
يا أما قربت إنى اسيبك
يا أما عايش فيكى هالك
يا أما ليه ناسيه حبيبك؟
يا أما مكتوب فى كتابك
إن مش بتردى بابك
ليه مصره تبعدينى
لو بعدت صعب أجيلك
**************
قاسيه ليه بالذات معايا؟
يا أما كفنى كنت شايله
ليوم ما تحتاجى الحمايه
خلتينى ماشى لابسه
ماشى باتلفت ورايا
والنفس فى صدرى حابسه
ماشى باهرب من قضايا
يا أما أبوس إيدك كفايه
**************
يا أما خايف موت من إبنى
لما يكبر هيعاتبنى
جبته ليه مع إنى عارف
شكل أيامه اللى جايه؟
يا أما أسف بس خايف
خوف معشش فى الخلايا
يا أما والله ما عدت عارف
هوا إيه أخر الحكايه؟
**************
يا أما لو مت فى بحورك
لو حاولت أهرب بعيد
ولا مدفون بين صخورك
ولا فى قطر الصعيد
إوعى تنسى تحكى عنى
إنى عشت فيكى ميت
مت فيكى عشق يعنى
كنت ميت م البدايه!!

Thursday, February 11, 2010

ساده



مقدمه لابد منها


شكر خاص الى الأخت العزيزه شيما - الشعب لابد له من حكومه تشكمه - لانها من الهممتنى كتابه هذا البوست بعد قراءه بوست لها مميز جدا بعنوان سكر زياده


وشيما من المدونين اللذين اجد متعه حقيقيه فى متابعتهم كما انها على المستوى الشخصى وان لم يتح لى التعرف عليها الا مره واحده فى لقاء المدونيين بالمنصوره نوفمبر الماضى الا انها تترك فيك انطباع مميز من أول وهله عندما تتحدث معها فهى مرحه جدا كما تشع من وجهها امارات الجدعنه او كما يقولون تحس بإنها بنت بلد من أول كلمه تتكلمها معاها


تحياتى لاختى العزيزه لان بوستها كسر حاله الجمود التى لازمتنى اخر فتره


اعزائى المدونيين


هوا البوست غريب شويه ومش عارف اذا كانت فكرته هتوصل ولا لأ بس عموما لو موصلتش نبقى نحاول نوصلها ومن يلاحظ أى كسور فى الوزن أو عيوب فى القافيه فليعذرنى لانى ما صدقت اكتب




ساده




هوا ليه طعم الحياه


بقى مر ساده؟


رغم إنه كان زمان


سكر زياده


هوا ليه الفرح هاجر؟


خد معاه كل السعاده؟
**********

ولا قلبى أنا اللى مات


جوه دفتر ذكريات؟


والغلاف مرسوم عليه


قلب أحمر وحكايات


لون خدود ست البنات


وبصحيح العمر فات؟
**********

رغم إنى لسه شايف


نفسى طفل فى إعداديه


بس روحى مش لامسها


مش حاسسها هى هيا
**********
يعنى إيه؟؟


هوا عمرى بيتسرق؟؟


يعنى إيه؟؟


أحلامى حبر على الورق؟


يعنى إيه؟؟


حصان وباجرى فى السبق؟؟


كسبان أنا؟


خسران أنا؟


غرقان أنا؟


فى بحور عرق؟
**********

طب هى لسه


الشمس طالعه؟


طب لسه نورها


نور زمان؟


ولا أصبح ضى شمعه؟


يادوب منور المكان؟


هوا أنا طالب فى جامعه؟


واللى جنبى دى حنان؟


اللى كانت يوم حبيبتى


هوا أنا اللى سيبت ولا


يا حنان إنتى اللى سيبتى؟
********
ولا أنا فى كتفى شايل بندقيه


عسكرى واقف حراسه


بأقضى خدمه عسكريه؟


بس روحى لسه برضه


مش حاسسها هى هيا
**********

لا دا أنا خلصت جيش

ف إيدى شنطه مش خفيفه


فيها كوم اوراق وفيش


رايح أستلم الوظيفه


رايح أبدأ أكل عيش؟
**********

لأ دا أنا لسه لى شهر


بس وأطلع ع المعاش


هوا أنا اللى عشت عمرى؟؟


ولا حد غيرى عاش


هوا ليه حاسس حياتى


فجأه ضاعت و بلاش؟


عشتها وكأنى عايش


بس لسه ماعشتهاش