Thursday, November 26, 2009

دم الشهيد


مقدمه لابد منها

مثلى كمثلكم جميعا استفزتنا الاحداث الأخيره وكلى أمل فى الحفاظ على كرامتنا داخل البلاد وخارجها ولكن أن تصل الأمور إلى هذا الحد من الجنون معذره لست مع هذه الطريقه فى التعبير

أن يصل بنا الغضب الى ان نتطاول على شهداء البلدين معذره لا أستطيع ان لم يمنعنا اى شىء تحت اى مسمى فليمنعنا ديننا من التطاول على الشهداء فى سبيل الله

ان يقال على التليفزيون على شهداء الجزائر انهم لقطاء غير مقبول ابدا

ان يقول احد العرب على موقع الكترونى لجريده ان مصر لم تنتصر ابدا فى أى حرب وانما هى "تمثيليات" حتى حرب اكتوبر فكانت خطه من اسرائيل غير مقبول ابدا

تطاولوا على بعضكم بعضا ايها الاموات فى ثوب أحياء ولكن لا تتطاولوا على من هم أحياء عند ربهم

معذره ان اختلفتم معى فى وجهه نظرى ولكن فلنحترم الدماء الطاهره التى سالت على أراضينا العربيه لتحررها من الاستعمار وترفع أعلامها ترفرف على أراضيها الحرة

دم الشهيد
دم الشهيد بعد السنين اتهان
يا امه فاقده مضومنها والعنوان

دينك يادوب أهو تعرفيه بالإسم

بايعه عروبتك بأرخص الأتمان

يا أمه ضحكت من جهلها الأمم

على التفاهات تتفقوا تتلموا

أما على القدس والأقصى

تتفرقوا والكل مش هامه

يا شعب فاقد مستقبله وحاضره

والغرب سيطر على

فكره وعلى أرضه

وكل شىء شوهته بكفايه

عاوز تشوه حتى التاريخ برضه

دم الشهيد مفيهوش نقاش وكلام

وإيه عملت لبلدك غير الأحلام

ضحى بروحه عشان خاطر أمتك

وإنت بدورك بتحرق الأعلام

فى الحرب كان ماسك سلاحه بإيد

ونفس العلم فى إيده التانيه

وفى قلبه كان قرآن كريم و نشيد

بيردده ميت مره فى الثانيه

رب العباد قال الشهيد ما مات

وإنت دفنته ودست عليه

مصرى وجزايرى عايشين

فى السما فى جنات

وأنا وإنت ع الأرض نشتم فيه

يمكن يكون طال الطريق أو تاه

لكنى هابكى عليك العمر يا خساره

راحوا الرجال ما بقى لنا غير أشباه

والله صحيح الدنيا دواره

بكفايه يا عربى صراع وغباء

وبلاش نضيع أجمل ما كان فينا

يربط ما بينا دين ولغه وشهداء

وتاريخ طويل بالفخر مالينا

أى إنتصار عربى على الأعداء

يبقى أخيرا إنتصار لينا

Saturday, November 07, 2009

المنصوره نورت


يوم الجمعه 6 نوفمبر فى المنصوره مدينتى الحبيبه

بقالى اكتر من سنه نفسى أحضر لقاء مدونيين لحد ما جت لى دعوه لحضور لقاء مدونيين فى المنصوره تصادف انى فى اجازه فتحمست وقلت ان شاء الله هاروح

يوم الخميس فضلت لحد قبل الفجر بحاجه بسيطه متردد اروح ولا ما اروحش بصراحه كنت قلقان مش عارف من إيه تحديدا انا صحيح بقالى كتير بأدون بس محدش يعرفنى كتير كنت قلقان لو روحت لاقيت الناس كلهم عارفيين بعض وانا الوحيد الغريب بينهم هيبقى احساسى إيه طيب الناس دول لو طبعوا غلسيين وفضلت قاعد لوحدى احساسى بالاحراج ممكن يعمل لى جلطه خاصه انى باتحرج جداااااااااااااااااااا

المهم قلت روح يا واد حتى لو معجبكش اللقاء اهو برضه تبقى اتبرعت بالدم واهو ثواب فقررت انى اروح طبعا منمتش لانى لما يكون عندى ميعاد باطبق لانى مش منطقى انام الساعه 5 واصحى مثلا 8

فطرت جامد جدا بناء على توصيات الجماعه اللى ليهم ماضى فى التبرعات واللقاءات قبل كده ونزلت المواصلات كانت لذيذه جدا وسهله

المهم نزلت من التاكسى قدام المستشفى وانا باعدى الطريق الطريق ده اتجاه واحد فانا مشغول انى بابص للمستشفى والاتجاه اللى جاى منه العربيات ده طبيعى البنى ادميين بيعملوا كده

ومسمعتش غير حد بيقول حاااااااااااااااااااااااااسب وطراخ عينك ماتشوف غير النور خبطتنى........................ عجله اى والله دراجه خبطتنى فى رجلى وفى فكى هتقولوا لى ازاى فى فكك تقريبا ده كان كتف الراجل اللى كان راكبها المهم الحمد لله اصابه فى الرجل والفك اتحرك حاجه بسيطه كده بس المهم انى موقعتش عشان البريستيج

المهم عديت وملقيتش حد فبصيت بعيد شويه كده لاقيت ناس المهم رحت لحد عندهم لحد ما قربت منهم بعدين قلت ادخل اقول لهم ايه افرض مش هما دول ودول ناس تانيه لو دخلت قلت لهم صباح الخير انتوا مدونيين ممكن يقولوا عليا مجنون لا اكيد هيقولوا مجنون

المهم وقفت شويه كده لحد مالقيت سيل تليفونات بنزل على صبرنى يارب اللى عرفتها فيما بعد فعرفت ان هما وعرفته بنفسى واتعرف بيهم ومن هنا بدأ اليوم الرائع

اولا الناس كلها لذيذه ودى حاجه غريبه

الناس كلها اجتماعيه وكلهم تحس انك تعرفهم من قبل كده

بيتعرفوا على بعض بسرعه وبتلاقى الكلام بيدور بينا بسرعه منين وازاى متعرفش

يمكن كلامى غريب بس دى انطباعات واحد بيحضر لقاء للمرة الأولى

فكره الاجتماع نفسها ظريفه جدا ومفيدة اوى للمدونين انك تحس ان فيه ناس بتشاركك هوايتك

كمان فكره التبرع حلوه اوى عشان تخلى تجمعنا على فعل الخير شكر خاص لبنت خيخه ول صبرنى يا رب

لو قلت لكم انى بقالى اكتر من سنه عاوز اتبرع ومكنتش لاقى حد يشجعنى

اليوم كان فيه حاجات كتير مميزه

اول مره ادخل مستشفى الاطفال واول مره اتبرع فى مستشفى فى المنصوره

اول مره اكل مع ناس لذيذه اتعرفت عليهم من ساعتيين يعنى انا وصلاح العمرى وسالى وساسو كنا قاعديين على ترابيزه واحده فى كووك دوور وكلهم باشوفهم لاول مره والغريب انى قعدت ارغى معاهم طول ما احنا بناكل

اول مره ادخل نقابه الاطباء

مركبتش مركب من زماااااااااااااااااااااااااااااااااااااااااااااااااااااااااااااااااااان

اول مره اشوف المنصوره جميله كده يمكن لانى كنت باشوفها بعيون الناس اللى منورينا من بره المنصوره وهما بيسألوا ده ايه واحنا فين وكده

قابلت اخيرا ساره طوبار - رحيل - محاولات للبحث عنى

ساره الوحيده فى النس اللى موجوده اللى اعرفها كويس كمدونه عمرنا ما اتقابلنا فى الحقيقه بس من اول ما بدأت تدوين وأنا اعرفها كويس

كنت سعيد جدا جدا جدا انى شوفتها وكنت خايف متجيش ما هوا دا اول لقاء ومعرفش حد غير ساره الحمد لله جت والغريب انى اول ما شفتها قبل ما اتعرف عليها جاللى احساس ان دى هى ساره وبعدين حد بيسألنى انت مدونتك اسمها ايه فقلت له رحله البحث لاقيتها بتقول انت محمد الغرباوى يااااااااا خبر اخيرا شفت ساره اللى فعلا على الطبيعه انسانه طيوبه وبشوشه جميل جدا انك تقابل حد عرفته قرابه السنتيين من وراء الشاشه ومن خلال الكلمات

فعلا يا سارة مبسوط جدا انى شفتك وربنا يوفقك ويسعدك

نيجى بقى للناس مش عارف حاجه غريبه ماقبلتش حد غلس كل الناس ظريفه ولطيفه وبيكلموك كانهم يعرفوك من زمان طبعا انا مش فاكر كل الناس ودا من أعراض الزهايمر المزمن اللى باعانى منه بس فيه بعض الناس فاكرهم

داليا ( قوس قزح ) اللى عاوزه تشوفلى عروسه هلاقيها من امى ولا منك يا داليا
فاتيما المره الجايه لازم نتعرف بجد قاتتنى المره دى

ساره طوبار بعد سنه ونص فتح السمكه بس لقى الخاتم الحمد لله

صلاح العمرى مسدس صغير حد محترم وجدع اوى

صبرنى يا رب على فكره المفروض تكون اول اسم والله انا معنديش ذوق دينامو المنصوره ربنا يجعل المجهود ده فى ميزان حسناتك

صبرنى يا رب شخصيه ظريفه جدا ونشيطه جدا

الاستاذ خالد همس الأحباب شخصيه محترمه اوى وعندها روح التطوع كده دبسوه فى لم الفلوس والله عمل مجهود بجد

بنت خيخه ماتكلمناش كتير بس كان نفسى اشوفها جدا خصوصا انها قائده حمله التبرع نورتينا واكيد هنتعرف على بعض فى مره تانيه

بوبو وكينج تووت اسره صغيره جميله يارب دايما سعدا وربنا يفرحكم بعموور

ابراهيم العدوى كأنى اتكلم المره الجايه لازم تتبرع يا ابراهيم اعمل حسابك بقى واتخن ابراهيم منصورى جميل مبسوط اننا اتعرفنا

مصطفى فك زنقه الاسم معلق فى دماغى لحد دلوقتى بنى ادم محترم اوى

ساسو او ابله ساسو خفه الدم على اصولها ربنا يكرمك يا ابله ويوفقك وان شاء الله نجيلكم الكفر مرة

ميرا وليساندرا اسعدنى الحظ واتعرفت عليكم واتكلمت معاكم للاسف شويه صغيره بس اهى فرصه عشان اعرف الطريق لمدوناتكم ليساندرا اعتقد زرتك مره زمان

سووول على فكره برضه سوول اعرفها من قبل اللقاء من مدونتها متكلمتش معاكى خالص يا سوول انتى مخصمانى سعيد انك جيتى

شيما الشعب لابد له من حكومه كنت هانساكى وطبعا كنتى هتموتينى بجد عاوز اقول كلام بس خايف تفتكرينى بعاكس خصوصا انك لسه متعاكسه ودافعه فلوس قريب بجد شخصيه ظريفه جدا وشكلها بنت بلد

عاشقه وغلبانه حد لذيذ جدا ومهرج ويحسسك انك تعرفه من زمان بجد يا دوك فرصه سعيده جدا
ضياء والفولى والله بعد ما نزلت البوست افتكرتكم ورجعت تانى عملت اديت عشانكم
ضياء حد طيوب اوى ومن الناس اللى كل ما اقف لوحد كان يجى يتكلم معايا سعيد جدا بالتعرف عليك ياضياء
الفولى المتبرع المحترف طلبوه بالاسم يتبرع فى مستشفى تانيه
الفولى برضه من الناس اللى تحسهم طيبيين وتحس انه شكل حد تعرفه

بقيه الناس سامحونى اولا الزهايمر شغال

ثانيا تعبت من الكتابه

اخيرا لو قلت ان اليوم كان من أجمل ايام عمرى والله يبقى مش بابالغ وشكرا لكل الناس الجميله اللى خلت اليوم جميل

وبالنسبه ليا اليوم ده واللحظات الحلوه دى عملت ليا رفريش يساعد على ان الواحد يكمل حياته الروتينيه من جديد

شكرا اصدقائى الاعزاء واتمنى نتقابل تانى فى لقاء اخر

ونورتوا المنصوره