حوااااا....

على جبينك

بيظهر إسمى يتلألأ

وجوه عنيكى بالمحنى

كأنى الفجر بيشقشق

ولما إيديكى تلمسنى

تحسسنى....

كأن الحلم بتحقق

فاغمض عينى من تانى

وأمسك طرف احلامى

فتبتسمى ...

ألاقى الكون بيتذوق

وألقانى

أنا اللى بقايا بنى آدم

بقيت آدم

يا حوا خرجت من ضلعك

ومش هاخطى

هاعيش وياكى فى الجنه

نعيش نحلم ونتمنى

أنا و إنتى نكون عالم

منتيش ملاك

منتيش ملاك
وأنا مش شيطان
ولقانا كان حكمه وقدر
عايزانى ليه
أطلع صليب
وأغفر خطيئه البشر؟
آدم صحيح إن كان خطى
فالضعف كان سر الخطيئه
لكنه تاب لم كفر
وأنا مش برىء
..يا حبيبتى
وإنتى مش بريئه
شايفانى ديب؟
والشوف مهوش كل الحقيقه
ما ديب يوسف
برىء منه
وابوه اللى بعيد عنه
بقلبه يشوفه لساه حى
شوف القلوب معجزه
وإنتوا بصحيح عجزه
ما بتلمحوا الخطوه
وعيونكوا فيها الضى
ومريم صحيح ام المسيح
لكنها عدرا وبتول
يوسف ..

يا اللى رموك ف البير
إشهد وقول
قلب الديابه ارحم
ولا اللى بينهم دم؟
يا عدرا مين كان صدقك
لولا الرضيع ينطق
يخرس لسان الذم؟
وأنا .. لسّانى
جوه البير
لا جانى واردهم
ولا نطق عنى
غير قلب قال باحلم

أنا عيدك

أنا عيدك
حروف إسمى
على إيدك
----
فآمنى بيا
خلينى
كما نفَسك
شهيق ....
تاخدينى جواكى
زفير....
أسكن على شفايفك

---
وخبينى
ما بين الرمش
فى الننى
عشان تحمينى
لو منى

---
وإبنى لى
فى قلبك بيت
فى كل دقه
يتعمر
وحبك يبقى
هوا الزاد
وتسقينى
حنانك أحلى
م السكر

---
وكل صباح
تطلى عليا
و تجينى
تقولى لسه
ما استكفيت؟
أقول لأه
تزيدينى
---

أنا عيدك
وكل عيد
وله فرحه

---
أنا اللى
عشتى تستنيه
يا غازله العمر
يوم فستان
و يوم طرحه

---
أنا عيدك
يا صايمه الدهر
عن الاشواق
أنا عيدك
يا حانيه الضهر
خشوع ودعاء

أنا عيدك

---
أنا فارس
رواياتك
أنا شاطر
حكاياتك
أنا كل اللى
يوم فاتك
وأنا جاييك

---
أنا الميت
فى أوراقك
أدينى اهو
بقيت حييك

---
ف يا عاشقه
قوام بوحى
دا بوح العشق
مش عيبه
---

ما أنا عاشق
وباتباهى
بعشقى ليك
يا حبيبه
---

أنا عاشقك
ومش ناكر
أنا متيم
ومش فاكر
اللى كان
قبلك

---
أنا قلبى
خلاص سلم
خلاص
ساب لك

---
وجاى شايل
كفن ابيض
وحتى الموت
على إيديكى
يطيب له
لو ف يوم
طاب لك

---
لكنى جاى
ومتعشم
فى عمر جديد

---
حياه أبدأها م الاول
كأنى باتولد تانى

---
كأنك عشتى
حملانى

---
سنين تايه
فى ملكوته
ادرو فى
عيون الناس
وانتى عنيكى
حضنانى

---

ويقتلنى
عتب غيرك
وباكبر برضه
جواكى

---
وحيد العمر
انا عشته
ولا عشته
لانه مكنش
وياكى

---
وف الأخر
أنا جيت لك

--
أقول ليكى
وكل الناس
أنا عاشقك

ومكتوبه
على قلبى

--
أنا منك
وسر ميعلموش
غيرى
فى شرع الحب
أنا إبنك

إرحل إرحل

إرحل إرحل
يلا و غور
ما احنا خلاص
هدينا السور
مش راح تقدر
تمنع نور
شمس بلادنا
من دى اللحظه
********

طول العمر
بلادنا الحره
مش بتراهن
غير ع الثوره
لم ديولك
غور على بره
إما هنحفر
ليكوا قبور
ارحل ارحل
يلا وغور

********
طول العمر
بتسرق خيرنا
بس بلدنا
ملهاش غيرنا
ومن اليوم
فى ايدينا مصيرنا
دوله جديده
ليها دستور
إرحل إرحل
يلا وغور
********

مصر مهيش

بلدك دى بلادى
ليا ومن بعدى
لأولادى
والله هترحل
يعنى هترحل
مهما تلف
ومهما تدور
إرحل إرحل
يلا وغور
********

إطلق كل
كلابك فينا
قولوا وعيدوا
وزيدوا علينا
دم الشهدا
حرر سينا
جه دلوقتى
عليك الدور
إرحل إرحل
يلا وغور

إسلمى يا مصر

إلى كل أصدقائى المصريين المخلصيين العظماء
تحيه من قلب الصحراء وحسره تملآ قلبى لانى للاسف لست بينكم الآن
للاسف سافرت بعد وفاة والدتى رحمها الله ب 12 يوما الى السعوديه لاستكمال عملى ولتنى لم افعل لاكون متواجد بينكم نخلق سويا مصرا جديده من نور
لا اعرف ماذا اكتب ولا ماذا اقول
كل ما اتمناه ولو كنت متواجد لكنت فعلته الا نتراجع النظام اثبت جبنه وهشاشته ورغم كل محاولاته البائسه بسحب الشرطه وفتح السجون واطلاق كلابه من البلطجيه والشرطه السريه ليرهب الناس ويشغلهم بالمحافظه على امنهم وبيوتهم وممتلكاتهم وتغيير الحكومه وتعيين نائب والاستعانه بالجيش لم تفلح
ان هذا التوقيت الحرج لا ينبغى فيه ان نتراخى او نتراجع لان وضع مصر الجغرافى والاستراتيجى يجعل من الصعب تكرار مع حدث فى تونس لان امريكا تود مهله حتى تقوم بتجهيز بديل تضعه فى السلطه بعد ان يقدم فروض الولاء والطاعه والتعهد بالمحافظه على امن اسرائيل
اخوانى الاعزاء استمروا ولا تسمحوا لاحد ان يسرق ثورتكم لاتسمحوا لاحد ان يمتطى ظهوركم لا معارضه ولا غيرها
استمروا حتى يرحل الطاغيه اولا ثم ما بعد ذلك يمكن ترتيبه
لا يوجد ما نخسره بعد 30 عاما من الذل والفقر والهوان واهدار الكرامه
ارجوكم بل اتوسل اليكم ابنوا مستقبل لاولادنا
احضروا فجرا جديدا
----------
بما انكم بعيدون عن الانترنت ولكنكم ان شاء الله عائدون
فاحب ان اسجل بعض النقاط
اولا
وقفه عربيه رائعه وتضامن غير مسبوق من كل الدول العربيه
فى مقدمتها الجزائر والمغرب وتونس والاردن وفلسطين
هذه رساله من صديقى عماد الجزائرى جاءت لى على الفيس بووك
----
Hi Mohamed!!
inshallah you are fine my freind we are all with you and following the events there allah m3akom take care of you brother and inshallah what Egyptians want will happen Ameen
Sallam 3likom
Imad
------

شباب العرب يردون باسم المصريين على افتراءات الحكومه الكاذبه وكلابهم المواليين وفنانى مصر الغير محترميين الذين يحرفون الحقائق من اجل خوفهم على مكاسبهم الشخصيه

------

هنا فى الصحراء ووسط جنسيات كثيره لا حديث لهم الا عما فعلتموه فارجوكم استمروا

كل من هنا منبهرون ومتحمسون ويتابعون الاخبار لحظه بلحظه

تحيه منى ومنهم

كيفن - استراليا

ريتشى - ترينداد وتوباجو

بوول و جونات - الفلبين

عبدالرزاق وماكسى - الهند

صديق - باكستان

فيكتور - نيجيريا

ناصر وعلى وحسن وعبد الله و حسين وماجد وحبيب - المملكه العربيه السعوديه

على وفهد - اليمن

مارك - لبنان

------------

اخيرا

حفظكم الله لمصر وحفظ مصر بكم

ولا تراجع ولا استسلام وكتر الدق يفك اللحام

بقايا الحلم

بقايا الحلم

فى علبه قطيفه
قام لملم
بقايا الحلم
واستسلم
وربع ايده..
.واستنى
يجي له الموت
كده فى سكوت

***
ماهو عايش
بقاله كتير
يبوس ف ايدين
سنين عمره
ويتمنى
تمر ببطأ
فتعانده
و من ايده

بسرعه تفوت
***

فيتحسر
على الحلم
اللى كان اكبر
فضل يصغر
ويتفتت
ويتشتت
فى ميت سكه

***
بقى حلمه
ف يوم يفرح
بقى حلمه
يادوب ضحكه
ف كلمه حب
تتقال له
ولو بالكدب
بقى حلمه
ف يوم يتحب
بقى حلمه
يبطل انه يتألم
ولكن كلها احلام

***
فقام سلم
وقام لملم
بقايا الحلم
واستسلم
وربع ايده
واستنى
يجى له الموت

أنا وعدك

أنا وعدك

أنا الحر اللى
وعده دين
أنا وعدك
وأنا واعدك
أكون عاشقك
ليوم الدين
أكون ليكى
كما ضلك
وحبك ليا
يهديكى
ولا يضلك
وحبى ليكى
يكون هوا
اللى فاضل لك
وأكون حلمك
وتجسيده
وقلبك أكون
أنا عيده
أكون الحاضر
الأجمل
وأكون الجاى
بجديده
أكون الراحه
وأمانك
أكون من جوه
إنسانك
وكلمه حق
ف لسانك
أكون بسمه
على شفايفك
أكون نسمه
على خدودك
أكون غنوه
على عودك
أكون فى الدنيا
دى وجودك
أكون الضى
لعيونك
أكون فى الجد
انا عقلك
وأكون ف الحلم
أنا جنونك
أكون نجمه
تنور سكه
لو عتمه
ووقت الشده
والأزمه
أكون مددك
أكون سندك
ومهما تلفى
فى الدنيا
أكون بلدك
فعيشى فيا
وإتهنى
بقلبى عيشى
وإتمنى
بصوتى للحياه
غنى
وهاتى ايديكى
فى إيديا
حبيبتى قربى
منى
وإحكى للبشر
عنى
قولى لهم
أحلى ما فيا
بصحيح حاجتين
انا وعدك
وانا واعدك
أكون عاشقك
ليوم الدين

مبقتش حمل البعتره

أولا عن جد وحشتونى ووحشنى حتى انى انزل بوست بس فعلا مكانش فيه حاجه اكتبها ولا زال بس اهو بقى هاجى اصدعكم شويه وخلاص

ثانيا
كل سنه وانتى طيبه يا أموره كملتى عامك الرابع يوم 31 شهر اكتوبر الماضى ومجبتش ليكى تورته ولا عملت عيد ميلاد
مدونتى الحبيبه آسف على قله ذوقى لكن معلش لازم انتى تتحملينى انتى منى برضه

ثالثا
عيد سعيد عليكم مقدما لانى راحل يوم السبت القادم الى الاراضى الصحراويه وربى العالم هيكون فيه هناك نت ولا لأ هيكون فيه وقت ولا لأ هيكون فيه مزاج ولا لأ وكفايه لأ لأ لحد كده

رابعا
الى كل اخواتى المدونين أسف جدا انى مسألتش طول الفتره اللى فاتت بس مش هاقول اعذار بقى وكلام من كده بس بجد بتوحشونى ويارب تكونوا كلكم بخير وسعاده وعيد سعيد عليكم وعلى كل اللى بتحبوهم

خامسا
حته بقى ع الماشى طالما جيت اهو اى حاجه المهم انها اتكتبت وخلاص

------------------

مبقتش حمل البعتره

وماتدبحيش الامانى
لسه فى قلبى صغيره
-----------
لساها نور
بيشق سكه وسط هم
----------
وإلضمى عمرى سنين
حوالين رقبتك
---------
لسانى انفع اكون حبيب
لمينى لم
---------
الحب عمره
ما كان حساب
---------
ولا نص محفوظ
من كتاب
--------
ولا خط مرسوم
بالقلم والمسطره
-------
وبلاش حبيبتى
تبعترينى
--------
قلبى بيصرخ م الالم
مبقتش حمل البعتره

ملحوظه:-

قد لا أكون موهوبا لأكتب عنكى

ولكنى عاشق .....أكتب إليكى

كنت مسامحك

محاوله لا اعلم رأيكم فيها
ممكن تقسموها رباعيات خماسيات سداسيات زى ما تحبوا
واللى يشوف حته كويسه يقطعها على جنب
بس هى اتكتبت على بعضها

كنت مسامحك
حاضن جرحك
كنت بازعل
نفسى واصالحك
**********
كنت بافوت
الكون دا ورايا
لما تكون ايدك
فى ايديا
*********
وانتى فى قربى
وانتى معايا
كان بيهون
الصعب عليا
********
كان يفرحنى
دايما فرحك
حزنك كان
بيموت فيا
*******
كنت مسحت
خريطه العالم
قلت خريطتى
هى ملامحك
*******
أرضى عيونك
بحرى شفايفك
كنت بحبك
كنت مسامحك
حاضن جرحك
*******
قبل ما اقابلك
قبل ما اشوفك
كنت بقلبى
على طول شايفك
*******
سامع صوتك
كان بيطمن
قلبى وروحى
فى عز سكوتك
*******
كنت يجوز اكدب
على نفسى
بس معاكى
كنت مصارحك
******
بس خساره
والف خساره
ليه ما فهمتى
ان انا حابك
******
حب حقيقى
من نوع نادر
وانى مكنتش
وقتها قادر
ان اكون لك
حسن الشاطر
*******
رغم ان انتى
ست الحسن
بس لا عندى
حصان بيطير
وانتى اميره
وقلبى فقير
ولا يملكشى
غير التعبير
بس وحبك
فوقهم حبه
من الاشعار
باكتبهم لك
*******
شعرى وقلبى
دول رسمالى
وكل ما املك
كنتى لى املى
بس نسيتى
اكون لك املك
بعترتينى
لميت شملك
كنتى بتتمردى
على حبى
فاستسلم لك
********
ما فهمتيش
ان العشق
علشان يكمل
لازمه تحمل
يمكن نتعب
واما بنتعب
واما طريقنا
يطول او يصعب
يبقى قرارنا
ان احنا نكمل
وانتى نهيتى
طيب بقى
كان ليه م الاول
********
ليه خليتى
عذابى يطول
واطلب منك
تبقى حبيبه
واطلب حبك
كالمتسول
*******
ليه خليتى
كل ظروف
الدنيا دى ضدى
بس فى صالحك
كنت مسامحك
********
كلمه اخيره
شاكر جرحك
لسه مسامحك
حاضن جرحى
وانت يا قلبى
الله يسامحك
والله يسامحك

أومال أنا إيه؟

مش سميع ورده أوى أو بمعنى أصح باسمع اغانيها بس لما يغنيها غيرها فأنا عاشق لصوت نجاه
ولكن سمعت أغنيه أكدب عليك وصراحه حاولت اعرف كلمات مين ومقدرتش لكن فيها سؤال جميل جدا
أومال أنا إيه؟
قولى إنت أنا إيه
إختر لى بر
وأنا أرسى عليه
ففكرت فى إجابه لهذا السؤال فكانت الاجابه هى الاتى

أنا بحرك أنا برك
أنا قولك وأنا سرك
ولو كل البشر ضدك
فلا تخافى ولا يهمك
تعالى ارمى هنا همك

وقولى كل ما فى نفسك
لو الدنيا فى يوم تقسى
تعالى واسكنى عيونى
ما ياما عنيكى ضمونى
فى عز البرد دفونى
ولما طريقى تاه منى
فى وسط التوهه دلونى
انا نقشك وانا رسمك
وكلمه سرى هى اسمك
تزهر كل احلامى
تمد طريقى قدامى
تحلى كل ايامى
أنا نفسك ومن نفسى
تجيبى مركبك ترسى
على قلبى اللى كان شطك
أنا بحرك أنا برك